I CHHUT CHIANG ANG?

I tun dinhmunah khan i lungawi em? I hlim em? I nihna leh i hnathawh, i eizawnna-ah

-ah khan i lung a awi em? He thil kan chhan dan hian kan tihtur kan tih leh tih loh emaw kan nih tur kan nih leh nih loh a hril thuk hle.

‘AW’ tia chhang thei kan nih chuan kan purpose kan hlen a ni thei ang a. AIH tia kan chhang a nih chuan kan purpose kan nun chhuah pui lo a ni ang. Tin, duhthlan tur dang nei tawh chuang lo, lungawi lo mah ila, lungawi zir a  ngai’ ti anga kan chhang a nih pawhin, kan purpose tak chu kan la hlen chhuak lo a  ni ang.

KAN PURPOSE BIBLE ATANGIN

Bible-ah chuan siam kan nih chhan hetiangin kan hmu,

Thil tha ti atan Krista Isuaah chuan siama awmin ama kut chhuak kan ni si a. (Eph 2:10)

Pathian ṭih la, a thupêkte zâwm rawh, chu chu mihring siam chhan a ni. (Thu 12:13)

Thil tha ti tur leh Pathian tih taka, a thupek zawma awm hi siam kan nih chhan (kan purpose) a ni tiin Bible chuan min hrilh. He thu hi chu a tlanglawn deuh a, tihian ngaihtuah dawn ang. Eng thil tha nge ka tih ve theih? Pathian rawngbawlna leh midangte tana rawngbawlna-ah hian eng nge ka tih ve ang le?

Keipawhin nuam ka tih eizawnna leh hnathawh, midangte min mamawhna ni se, chumi hmanga Pathian rawngbawlna ka thawh theihna (eg. thilpek pek tur ka tuak chhuahna, Krista chanchin tha midangte hnena ka hrilh theihna, adt) hna thawk thei tura inbuatsaih hi kan tihtur pawimawhber te zing a mi a ni.

KHUA KAN TLAI FO

Kan purpose tak hmuchhuak tur leh tihhlawhtling tur hian mi tam tak chuan kan hun hmasa – naupan lai / tleirawl lai -a Pathian kan hnaih loh avangin khua kan tlai fo a. ‘Lalpa tih hi finna bul a ni’ tih sawi fo chung hian Lalpa tihna-in a ken tel (thuawihna, taihmakna, rinawmna, insumtheihna, adt)  kan paih thla a, hringnun hriatthiamna (finna) kan lo tlachham thin. Hei hian kan nih tur ni pha lo-in min siam a. Kan inhriat chhuah meuh hi chuan khua kan tlaiin, kan nihna leh hnathawhah pawh kan lungawi zo tawh thin lo  a ni.

ENGTIN NGE KAN PURPOSE KAN HMUHCHHUAH ANG?

Kan tihtur leh dam chhan hmu chhuak tura thil pawimawhte i han en teh ang

1   Eng nge kan lungkham (care)?

     Kan thil lungkham hian kan kalna tur kawng  a hril thui viau. Chhungkua, khawtlang, ram, khawvel thlir zau zel ila, eng thil nge siam tha thei dinhmun-ah ding ta ila, kan siam that ang tih zawhna te inzawt ila, hei hian kan kalna tur kawng min kawhhmuh thei.

2.  Eng thil nge kan hlut zawng? (Value System)

Kan ngaihhlut zawng hian kan purpose tur a hril thei thin a, kan nun min siamtha leh min eitu, tih ve theih kan chak thil leh hlut em em kan nei a nih chuan kan purpose hmuhchhuahna kawngah min pui thei ang. Amaherawhchu, hlutzawng dik lo leh tha lo awm thei lakah erawh kan inven a ngai thung ang.

3. Kan chakna, tuina leh talents hriat chhuah.

Mahni pawhin kan inchhut thei a. Chumi piah lamah kan kianga awm thin, kan thian, kan unau, mi rintlak te hnenah min hmuh dan  - Eng thil/ kawngah nge thei/thiam nia min hriat? tih  zawhna zawta kan chakna leh thatna hmuhchhuah hi kan purpose hriat nan a pawimawh hle.

4. Tih chhin

Hun remchang dapa kan kalna ni awma kan hriat han tih chhin leh luh chilh chhin te hian eng nge chu thilah chuan kan nih chiah leh kan theihna kan tih chhuah theihna tur a ni em tih min hriattir thei dawn a ni.

5. Lawmna nun neih

Khawvel-ah hian lawmna tur thlirin zawng ni ta ila, tam tak hmuh tur a awm a ni. Malsawmna kan dawn chhut leh lawmna chang hriat hian hringnun kan thlir dan a thlak hlauh thei a. Ngilneihna, midang hriatthiamna leh nun tha dang tam tak min tuh sak thei a ni.

PURPOSE KAN NEIH ANG TIHHLAWHTLIN THATNA

Thui tak sawi tur awm mahse, hmunin a daih loh avangin tawitein tarlang ila. Siam kan nih chhan ang taka awm leh kan tihtur dik tak tih hian awmze neiin min nun tir a ni. Tlachawp taka nun hi mahni purpose hre lo te hun hman dan a ni a, awmze neiin an nun an hmang chhuak zo lo a ni.

Siam kan nih chhan anga nun chhuah hian hlimna, lawmna nun min pe let a, tisa leh thlarau-ah kan dinhmun a chawi kang a, mi puitling-ah min siam thin a, kan vela mite tan rah chhuak theiin kan awm thin.

Khawvel-a kan awm chhan tihhlawhtling tur hian hmingthan kher a ngai lova, hmingthanna nen a kalkawp bawk hek lo. Kan thinlungin tihtur a hria a, kan vela miten hmuhpui thin. Pathian tihna nen, a thupek zawmin kan nun hmang  tlat ila, kan dam chhan ang takin kan nung chhuak ngei ang.