Kan comedian PC Lalṭanpuia’n a pianthar dâk leh chungchang a sawi  a, ‘hnungtawlh mai pawh ni lo, a tleng hian ka tleng a’ a tih kha kan nuihpui duai duai a nih kha maw!! Ni e, pianthar hnu hian kan par vul chúk a, kan chuai leh mai ṭhin. Tûnlai kan context-ah phei chuan camping zawha thlarau boruak hlimawm leh inpâwlna duhawm tak kan neih ṭhin pawh kha a awm thei ta meuh lo a, kan fím kâk vek mai.

HNUNGTAWLHNA CHU PATHIAN MI, LAL ISUA  KAN TANA A THIHNA LEH THAWHLEHNA RINGA PIANTHARNA CHANG TAWHIN  MIHRING HLUI ZIA  THLAH LOA LAL ISUA DUHZAWNG  TI LO-A LAL ISUA  HLAT ZAWNGA AWMNA A NI.

 Hnungtawlhna hi ṭhalaite nun-ah hian a hluarin kan thil buaipui ber pakhat pawh a ni âwm e, engnge a nih chiah-a, engvânga lo awm nge ni tih leh eng angin nge hnungtawlh lo tûrin hma kan  lâk ang? 

Hnungtawlhna chhan hi kawng hrang hrang a awm thei ang -

 Sim tum lohna :-

Salvation Camping-a Campers tam tak zawhna nia an sawi ṭhin chu Çhhandamna bo theih leh theih loh chungchang a ni. Hei hian ngaihtuahna thui tak min pe a, kan thil sual tih ṭhinte sual thlah tum lova, pianthar hi kan tum ṭhin niin a lang. Mahse, Pathian hmangaihna chhân lêt nan erawh ama lam hnaiha sual kalsan-a theihtâwpa ama rawngbâwl a ni si a ni.

Pathian hmangaihna-in min hneh tâwk lo-

Pathian hmangaihna-in a hneh tak tak te tan hi chuan hnungtawlh hi thil harsa tak a ni ve thung. Pathian hmangaihna-in mi sual thi tûr min chhandamna te, kan tûar áia Lal Isua’n Kraws-a min tawrhsakna te hian kan thinlung a hneh tâwk lo a nih chuan a hlutna kan hre tâwk lo a, kan thil ngaihhlut lêm loh a beng dawh reng hi thil harsa tak a ni ṭhin a ni.

Chapona - Ṭha Intihna:

Mihring chapona hian kawng sual min dâi tír awlsam khawp mai. Mi piangthar tam tak chuan rawngbawlna-ah an duh fîr a, an kal fuat fuat mai a, midangte an duhkhawp lo a, mahni leh Pathian inkár dah hmasa lovin, midang nun an buaipui ta thung ṭhin a, hei hian rah ṭha chhuah a hnêkin Lal Isua aṭangin a pawt hla dâwrh ṭhin a ni. Pathian thû pawhin ‘Mahni mita khanchhuk awm chu ngaihtuah si lovin I unau mita hmawlh te tak te awm chu i hmuh ni?’ (Mat :7:3)

Tiin min hrilh kha maw?

Ṭhian hlui thlah thei lo -

Kan pianthar hian sualin min thlah ta tihna a ni silo a, min ûm zuiin Ringtu-lukhâwngnei kan nih lohna tûr hian min beiin min thlêm nasa hle ṭhin a ni. Hetah hian kan pianthar hma-a kan kawm ṭhin ṭhian te hi engemaw chen kalsan a ṭûl chang a awm ṭhin. ‘Misual bula awm thei lo, piangthar inti ve si’ kan lo ni a nih pawhin kan thlarâu nun tána a ṭha zawk a nih chuan kalsan rih mai a ṭha a ni. Ṭhian hluite bula kan awm leh seuh seuh avâng hian thlêmna kan do zo lo fo a, inthlahrung tak leh tui lairapin min siam ṭhin rêng a ni.

Kohhran belh tlat lohna -

Kan pianthar hian kan tána him ber chu kohhran leh ṬKP (ṭhalai te tán) programme-a tel tlat hi a him a ni. Thlarau nun chaw kan lâkna pawimawh tak a ni a, kohhran leh ṬKP programme kan tel thei lo a nih chuan hnungtawlh bâk hmabâk kan nei lo a ni. Kan tih ngai loh a nih phei chuan a harsa leh zual ngawt ang, mahse, kan paltlanga nuam kan tih chin a awm ngei ang

 KA HNUNGTAWLH LEH ṬHIN - II

       Part I lam-ah kan hnungtawlh chhan zual pui te kan en tawh a, tun ṭumah chuan engtinnge hnungtawlh lo tûrin kan invên ang a, ṭan kan lâk ang kan en ve thung dáwn a ni.

DAILY DEVOTION:

Nitin Pathian pawlna (Fianrial hun) hun hman hi ringtu chak leh belhchian dâwl ni tûr chuan tih mâkmawh a ni. Bible chhiar leh tihtakzet-a ṭawngṭaina neih ṭhin tûr a ni a, tûnah phei chuan Nitin Pathian pawlna-a lehkhabu hman tûr dâwr-ah pawh lei tûr a awm tawh a, Mobile Application pawh tam tak download tûr a awm a ni.

ṬAWNGṬAI FO

Pathian hi 24/7 Pathian a ni. Nitin Darkar 24 chhung kan duh hun hun-ah kan be thei!! A va lâwmawm êm!! Pathian hnênah hian lâwmthu sawi, dîl leh dîlsak ṭawngṭaina hi kan hmang fo tûr a ni.

ṬHIAN KAWM FIMKHUR

Mizo chu inkawm laih laih hnam kan ni a, kan zia tam tak hi kan ṭhian kawmte aṭanga kan lâk a ni. Chuvângin Pathian lam hnaih tlat tûr chuan Pathian ṭih mi bulah hun kan hman tam a pawimawh.

MEDIA THLAN FIMKHUR

Tûnah chuan Computer, TV, Mobile te nen kan inngheng tlat tawh a, heng-a kan thil hmuh leh hriat te hian Pathian nen kan inkar a ti hla-in a ti hnai thei a ni.

Pathian thu/hla ngaihthlak tam te hian kan nun chhungril hi Pathian nen a thlunzawm thei a ni. Chutiang chiahin khawvel hla dukdak vak lo ngaihthlâk tam pawhin Pathian lak aṭangin min pawt hla thei bawk.

KOHHRAN BELH TLAT

Kohhran, ṬKP leh pawl kan telna tûr te-ah inhman tlat tûr a ni. Kan  mizia leh nun tawh dan azirin kohhran leh ṬKP-a inhman pawh hi kan châkin kan peih lo êm êm thei bawk. Kan nun-a ṭhatna intuh leh kan thil hriatte hi vawi leh khat-a kan neih duak a ni lova, hman aṭanga kan thil hriat leh tih aṭanga kan chhawm chhoh zel a ni. Vawi 1 fellowship-ah duh ang zawng zawng kan hmuin kan tem kher lo ang. Hemi avang hian kan bansan ngawt tûr a ni chuang lo.

TAWRHCHHELNA

Ringtu nun kawng hi nuam leh hlimawm chauha duan a ni lova, hrehawm tuar tûra koh kan ni zâwk a ni. Rawngbawlna-a a hrehawm pumpelh zêl duh ṭhin chu hnungtawlh zawngin a kal tihna a ni. A hrehawm-a Pathian rinawmna lo lang ṭhin tem tûra kan beih fan fan a ngai ṭhin.

MIDANG NI LOVIN ISUA

Ringtu tam tak chuan mite nun hi kan in vuak beh tir tlat thîn. Setana hmanrua ṭha tak a ni tlat a ni. Midang nuna buai tlat mai ṭhin ringtu nun chu phunchiarna ruam-ah a tang a, hawina lam apiangah sawisel tur a awm si a, ama nun a invuak chhiat tir vek ṭhin a ni. Chuvangin en tûr dik Lal Isua lam kan en tlat hi kan tih tur a ni.

TLANGKAWMNA

  ‘Ringtu nun hi mahni tana chakai khawrh kan ni’ tiin sawi ṭhin a ni. A dikna chen pawh a awm âwm e, kan chi tuh rah kan seng dawn tih Pathian thu-in min hrilh miau a ni.

Hetiang a nih avang hian kan nuna thutlukna siam tur chu keimahni ṭheuh kan ni a, nitin  kan thutlukna siam hi Lal hma-a kan dinpui tûr a ni.

Ringtu nun kawng kan zawhna-ah hian hlim lâwm reng theih zawng a harsa ṭhin, mahse, Lalpa-a zung kan kaiha Grep hrui tak Isua kan zawm tlat chuan chau mah ila kan tho leh ang a, mupui angin kan thlâwk leh ṭhin ang.