Kum a lo thar leh ta. Kohhran rawngbawltute kan inthlang thar a, a lâwmawm khawp mai Pathianin kohhrante hnena thu a hriattirna hmanruaa ṭan chu hna ropui tak a ni. He hna ropui tak hi thinlung leh tihtak zet a, Pathian hriakthihna hnuaiah ngei thawk tûrin inpe tlat ang u. Kan upate leh rawngbawltute maicham luah thin tána inkhawm nuam zawk kan neih theih nán thu tlem kan thawh vê teh ang.

1   Inkhawm hun hman dan tûr sawi hmasak:  Inkhawmnaah hian hun hman dan tlángláwn deuh chu kan nei  vek ang. Mahse kan hun hman dan tûr indawt sawichhuah hmasak hi a finthlak hle. Hemi ruál hian zai hruaitu tan inbuatsaihna an neih theih nan kan hla sak tûrte sawi lang nghal ila, zai hruaitu tan a nuam leh zual viau ang.

2 Thupui sawi:  Thuchah kan sawi dawn chuan kan inbuatsaihnaah a thupui engemawtal chu kan chhawpchhuak ang. Kan thuchah sawi tur rêng rêng englam hawi nge (a thupui) sawi hmasak hi tih ngei ngei atán a ṭha hle. Kan thusawi lo note duh tán a nuam duh viau ang. Tin ngáithlatute pawhin kan thupui aṭangin ngaihthlak tum dân an lo nei ang a, hemi hian ngáithlatute a tiphûr zual thei ngei ang.

3    Bible indawta chhiâr:  Ho têin lang mahse, min ti hahdam theiin a rinawm. Thuthlung thar bu tawp Thupuan kan kéu a, Genesis kan kéu leh a, Hebrai mite hnêna lehkhathawn kan kéu leh a, Isaia kan kéu lêt leh a. Hetiang ni lo hian Genesis – Isaia – Hebrai – Thupuan – a indawtin chhiar thei ila, a bu min lo enpuitute tán hahdamna engemaw tak a siam ngei ang.

4   Thusawi dân:  Keimahni kal tlangin kohhran hote hnenah LALPA’n thuchah a sawi tih hriatreng hi a pawimawh hlê. Kan thusawi dânah kohhran mite diklo lutuk a ngaihna kan neih hián thusawi a tlak nat lohphah thei. Tirhkoh Paula hi rawngbáwltute entawn tûra hmahruáitu a nihna a awm. Ani chuan a thuchah rêng rêng ah hian kohhran mite demna/zilhna thu uchuák tak a chhâkchhuak ngai lo. Mi famkim kan nih lohna hriain in fuihna lam pang a uar zâwk a ni. Zilhna ṭawngkam hmang lova fuihna ṭawngkam hman thiam hi rawngbawltu tan chuan thil pawimawh tak a ni.

5  Rawngbawlpuite zahawmna hriat:  Upa leh Rawngbawltu te hi kohhhran mite kaltlanga LALPA’N kohhran enkawltu atána a ruat ani tih hi kan pawm tláng vek ang. Mâicham aṭanga rawngbawlpuite diklohna leh tlinlohna sawi hian kohhran mite rilru a tihnuâlin rah tha lo tak a chhuah thei a ni. Rawngbawlpuite zah thiam hi a Pathian thû hlein ka hria.

         A tâwp berah chuan,  Kohhranah rawngbâwlna hnâ thawh hi LALPA khawngaih rawngbâwl hnâ a ni tih hriain, amah ráwn chungin kan vei záwng záwng sawi mai lovin, kan thuchah sawi tûr rêng rêng kohhrante mamawh nia kan hriat ngaihtuah a, Pathian  pâwlna nung neiin thuchah puan tum tlat zel ang u. Tichuan rawngbawlna hlawhtling LALPA malsawm tlâk rawngbâwlna kan nei thei ngei ang.