RAH CHHUAH KRISTIAN

FP Laltlankima @ Thalai Aw 15 Jan 2017

       Mizoram hi Kristian ram kan ti a, Kristian kan in pel suau suau mai. Amaherawh chu Kristian hi chi hnih-in han then ta ila hetiangin - Rah chhuah thin Kristian leh Rah chhuah lo Kristian. A awmzia kan hrethiam mai awm e. Rah chhuak thin Kristian leh Rah chhuak lo Kristian hi a inkar a hla khawp mai. Tun tum-ah hian Rah chhuah Kristian tih kan zirho dawn a ni.

Rah chhuah turin mamawh kan nei :

Thlai chi chuan rawn chawr no a, lo thanglian a, rah lo chhuah turin Ni eng, Tui leh Lei tha/Chaw tha a ma mawh. Hetiang chiah hian Kristian-in rah chhuak nun nei tur chuan kan tih theih loh chaw tha kan mamawh a - Chungte chu Pathian hnen atangin kan dawng a ni.

 2 Petera 1:1- 4 thu kan chhiar chuan Pathian hnen atang hian Rinna Thilthlawnpek, Amah hriatna leh Nunna leh Pathian ngaihsak kawngah chuan thil zawng zawng min pek thu  tarlan a ni.

   Pathian hnen atang hian ringtu ka nihna anga kan mamawh zawng zawng kan dawng tihna a ni.

Tichuan, chang 5-na atang hian kan tih ve tur chin sawi lan a ni  ta a, hemi tak-hi kan zawm a, kan tih tam poh leh rah kan chhuah tam mai dawn a ni.

Pathian chuan a tihtur ang ang keimahni-ah RINNA min pein hna a thawk zo tawh a, kan chan ve lam - chu rinna-a kan telhtur i han en ho leh teh ang.

THATNA 

Pawn lama kan landan hi kan chhungril nihna a ni.  Rilru tha neiin nunphung tha kan nei ang a. Pathian-ah lawmna kan nei ang a, chu chu thatna-in kan parchhuah tir thin ang.

HRIATNA  

Kristian kan nih ang a kan mawhphurhna leh inlaichinna te hriatna kawngah kan thanglian tur a ni. Hemi atan hian kohhran thiltih-ah kan tel tam a ngai.

INSUMNA/MAHNI INTHUNUNNA

Kan thusawi duh -zawng, kan tem duhzawng, kan hmuh duhzawng, kan hriat duhzawng -ah te Pathian duh zawnga kan chet chhuah theih nan kan inthunun ang.

CHHELNA

Ringtu nun kawng-ah chu chhelna tel lo chuan zawh a harsa hle thin. Chhelna nei lo mi tan chuan chawlhsanna tur hmun leh hun a tam thin. A nawm hun lai-a ringtu chauh ni lovin a hrehawm-ah pawh chhel takin kan kal thin tur a ni.

PATHIAN NGAIHSAKNA

Pathian ram leh a felna hi kan zawngin kan ngaihsak ang. Amah ngaihsaktu te Lalpa’n a ensan ngai lo.

HMANGAIHNA

Hei hi Kristian nun ki pui ber a ni. Pathian kan hmangaihna chu Kan unau, thenawm khawvengte rawngbawlpui te hmangaihna in a zawm ang a, hei hi kan neih chuan par chhuakin rah kan chhuah lo thei lo a ni.