Lalpa chu ring la, thil tha ti rawh; He ramah hian awm la, rinawmna um zel rawh.

Rinawmna hlutna kan bosal ta em ni ?

         Mihring kan nih chhunga kan chhungril nun ziding min siam máwitu leh kan chêtna tinréng, midangte min hmuh loh lái pawha min thunun ṭhîntu mihring nihphung (quality), Pathian thu-ah pawh ‘Thlarâu rah’ zínga mi – Rinawmna hlutna hi tûnlái mite hian kan bosal ta niin a lang. 

Tute nge bosal ta lê ?

         Kan nitin chêtphung - midang eizawnna thil-a kut kan thlâkna te, sawrkhár hna kan thawhna kawng-ah te, sawrkhár-in kan hamṭhatna tûra chanvo min pêk kan khawih chhunzawm dân-ah te, kan nihna dik tak leh kan thiam dân dik tak hâilan leh kan pholanna hun (Examination) kan hmachhawn dân te han thlír a, han zir hian mi tam tak chuan midangte lak-ah leh keimahni ngêi laka Rinawmna hi kan thlachham tawh viau em ni le? tiin thlirtu mit chuan a thlír a ni.

 Rinawmna hi a hlu ta lo-in  a lang em ni?

         Tûnlái kan dinhmun han thlîr hian Rinawm taka Retheih chu thil ATTHLÂK tak niin a lang ta em ni? Mi thil diklo tia chhungril ngêt si a páwnlam lam dâna pármáwi chu a mawi viau ta zâwk em ni? Mi an lâkluh bâk-a chê te nun chen dân chu chutiang êmin em ni a lo awhawm tâk? Engatinge chhúngril ngêt nun neih pawh pawisa ta lova kan hun kan hman tâk mai ni?

Rinawm loh pawi zia hi kan ngaihtuah phal ngang lo em ni?

         Rinawm lo taka hlawhtlinna lem changtu te hi an in leh lo chauh leh an hlawhtlinna lem chauh i hmú a, nang áia chan ṭha zâwk nia i hriat reng lái hian an tuhrah seng mékin Lungngaihna namen lo leh Nun Hahchawlhlohna thûk tak midang hmuh theih loh tûra theihtâwp-a thuhrûk an tum hi i hmu em le ?

Rinawmlohna nghawng hi a thui lutuk!

Rinawm lo taka thil ti ṭhîn te lakah hian eng ang chiaha thil ṭha, duhawm leh hmathlîr ṭha nge kan beisei theih ang le? Diklo taka a hlawhtlinna lem a channa tûr a tih hreh sî loh chuan dik tak-in hnâ a thawk ang maw? Á piangthar mahna le! Innghahna tlâk-ah kan ngái hauh lo ang!

Rinawmna hian Hlutna a la nei asin!

         Pathian thutiam, ‘He ramah hian awm la, rinawmna ûm zêl rawh, Lalpa chungah chuan lâwm bawk rawh, tichuan, i thinlung duhzáwng chu a pê ang che’ tih hi Chatuana keini ringtute tán chuan thudik tûr a ni asin. Rinawmna bán chu ‘Dikna leh Taimâkna’ a ni a, chu chuan Hlawhtlinna Dik tak chu min pe ṭhîn a, chu hlawhtlinna chu a pár a máwi a, midangte a huap zo a, mi zawng zawng hlawhtlinna a ni ṭhîn.

Kan fate nun-ah Rinawmna i tuh ang u!

         Keini chhan-ah chuan thil a kal thui ta lutuk a, chhungkaw hmasâwnna leh hamṭhatna tûrin kan tihtheih a tlém pawh a ni thei. Mahse, kan fate’n chu nun leh dinhmun chu an paih kian theihna tûrin Rinawm taka nun an hman chhoh theihna tûrin ṭan i la ang u. Rinawmlohna nên hun an lo hmang chho a nih zawngin ‘Chhungril nun lungngái tak leh neih loh chin ûm-a rual elna rilrû-a khat rêng rêngin hun an lo hmang ang a, chhungkaw khawvâr tik a awm lo ang tih pawh a hlauhhlelh awm love.

 Josepha hrereng ang.

         Mi tumah-in an hmu lo, ti mahse thuruk anga zêp kumkhua theih pawh a ni ang, a recommend-na avângin Aigupta chhungah hruaitu lawk tak pawh a nih theih hial ang; nimahse, a thiltih chu mihring mithmuh loh nimahse, a rûka hmurengtu LALPA a awm tih hriain Potiphara nupui thlêmna a hnar a nih kha! LALPA remruatna rinawm tak chuan dik lo taka thil ti a a neih theih hotu nihna chu a hun tak-ah a rawn nih tír ta tho a ni.Kan chân tûr emaw kan tih hi kan chan tûr a lo ni zâwk ṭhîn!

 Ṭhalai Rinawm taka awm te hi mi hmuingíl an ni ṭhîn.

Kan Bible chhúng a ni emaw, Khawvêl History a ni emaw, kan bial chhúng mi pawh an thil tih kawng tinrénga Pathian ṭih a, mi rinawm leh mi ti tak tak te chuan an nih tûr dik tak, an tána Pathian ruahman chu an hâichhuâkin Pathian-in hmuingîlna a pe ṭhîn a ni. Heti hi a ni zâwk asin, Dik lo taka i tiha i neih ái chuan dikna ṭana rinawmna nên i neih loh ngamna khá sum tak tak pawhin a lei zawh loh thil hlû – Pathian mizia chu a ni e.