Kan hmelma pa Setana hi Dawt pa ti hialin Johana 8 : 44-ah kan hmu. A tum ber chu dawt hmanga ringtute leh Pathian lama tuihalte pawh min awp beh tlat a ni. Chu dawt avang chuan kan rinna-ah pawh thang lian thei lo leh kan hnaih tur ang pawhin Pathian kan hnaih theih loh phah hial thin a ni.

Setana hian Pathian thu hmang tho siin thiam takin min vehthlem reng thin a, a dawt hman lar zualte han tarlang teh ang.

​I nun hlui hi ngaihdam theih a ni lo:

Setana hian kan nun hlui min thlir kir tir nasa thin hle.  Pathianin min ngaihdam tawh reng-ah hian keimahni zawk hi kan lo inngaidam thei lo leh fo zawk thin a lo ni. I Johana 1:9-ah chuan ‘ Kan sualte thupha kan chawi chuan kan sualte ngaidam tur leh kan fel lohna zawng zawng tlengfai turin amah chu a rinawmin a fel a ni.’ tih thu kan hmu. Setana hian Pathian hi ngaihdamna nei lo Pathian leh Pathian thikthu chhe tak mai ni-a min hmuh tir tlat a tum a ni. Kan nun hlui min thlir tir a nih chuan Setana chu chu a hmalam hun kan hriattir ve thung dawn nia, “Tin, anmahni bumtu Diabola chu sakawlh leh zawlnei der awmna, mei leh kat dilah chuan an paih ta a;  tichuan chatuanin a chhun a zana nghaisakin an awm ang” (Thupuan 20 : 10)

Misual i ni

“Ni e, misual ka ni; mahse, Krista thisenah chuan ngaihdam ka ni’ tih hi kan vawng tlat tur a ni. “Tumah mi fel tak reng an awm lo, pakhat mah an awm hauh lo” tih thu Rom 3 : 10-ah kan hmu. Tin, I Johana 1 : 10-ah chuan, ““Thil ka tisual lo” kan tih chuan amah chu dawtheiah kan siam a, a thu pawh keimahniah a awm lo a ni” tih thu kan hmu. Paula hian a hmuchiang hle mai, ‘Mi rethei ka va ni teh lul em! He thihna taksa lakah hian tuin nge min chhanchhuak ang? Isua Krista kan Lalpa avangin lawmthu ka sawi a ni. Chutichuan keimah tak chuan ka rilru chuanin Pathian dan rawng ka bawl thin, ka tisa erawh chuan sualna dan rawng ka bawl thin’ (Rom 7:24-25) tiin a sawi a ni. Rom 8 : 1-ah chuan, “Chutichuan tunah zawng Krista Isuaa awmte tan chuan thiam loh chantirna a awm tawh lo” tiin min hrilh bawk a ni. Misual kan ni a, Krista-ah chauh Lalpa’n mifel-ah min pawm leh ta a ni.

Pathian thu sawi ngam tur i ni em ni?

Misual kan ni tih min hriat tir avang hian Pathian rawngbawlna-ah kan hnufum phah thei hle a ni. Pathian thu sawi tlak-ah kan inngaih loh phah hial thei. Pathian thu chu mifelte sawi turah kan dah chuan Pathian thu sawi tur mifel reng reng kan awm zo dawn si lo.

I sual vanga tuar I ni

Kan thiltih sual vanga Pathian thununna kan tawh chang a awm thei a, kan tawrhna zawng zawng erawh kan tihsual vang a ni vek lo. Tawrhna hian kan tana tuartu Lal Isua anna –ah min ti thanglian thei thin zawk a ni. Kan nunah harsatna, retheihna, tihduhdahna kan tawh changin Setana hian Pathian thinurna tawng bua anga min inngaih tir a tum fo thin. Lal Isua nun te, Joba thil tawn te, Paula rawngbawlna te kha thlir ila, tawrhna satliah leh namai a ni love.  Lal Isua chuan nitin mahni kross pua zui turin min duh a, kan tawrhna leh kan duhthu sam loh thil kan tawn te hi Pathian min hnaih tirtu zawka kan hman a tha a ni.

I danglam lo.

Setana hian ‘I danglamlo’ tiin min hrilh fo thin. Ringtu nunah hian danglamna engemaw tak hmuh inbeisei hi a awm thei fo reng a ni. Isua-a piantharna kan chan hian thilsiam thar kan ni a, kan danglam tawh reng a ni tih kan hriat a pawimawh hle. Danglamna lo lang chhuak erawh damchhung daih a ni e. Danglam vak kan tumna hi Setana bumna a ni a, kan piantharna min inrinhlelh tir hi a tum ber a ni tlat a ni.

Setana hian ringtute beihna atan hian Pathian thu thiam taka a hman avangin hneh a har hle. Kan buante hi tisa leh thisen an ni si lo,lalnate leh, thuneihnate leh, he thim chunga khawvel roreltute leh van hmunahte thlarau sual ho awm te an ni zawk si a, kan do zawhna turin Pathian ralthuam famkim kan inbel a ngai takzet a ni.