Kan buante hi tisa leh thisen an ni si lo, lalnate leh, thuneihnate leh,he thim chunga khawvel roreltute leh, van hmunahte thlarau sualho awmte an ni zawk e. (Ephesi 6 :12)

Thlarau Indona hmun-ah kan cheng a, kan thinlung ngei pawh hi Indona hmun a ni. Hmelma-in tha a rawn thawh dan leh min sut dan hriat hi hnehna chang tûra thil pawimawh ber te zinga mi a ni. Tun ṭumah hian Setana’n eng ang tactic nge min beih nan a hman tih lo zir ho leh dawn teh ang.

HNUALNA -

Rawngbawlna-ah leh kan nitin thiltihna -ah pawh Setana hian min tih hnual hi a tum reng a ni. Rawngbawlna hlawhtling lo leh theih loh tûra ngaih tlatna te, kan tisa eizawnna kawng leh hnathawhna-ah pawh sâwt lo leh tha chuang sênna anga ngaihna te kan thinlung-ah tuh a tum tlat ṭhin.

Mi, kan hnual tawh chuan kan rawngbawlna leh thiltih-ah phurna kan nei lova, kan bansan mai ṭhin. Pathian hi a lama bán phar ṭhinte hnên-ah a awm reng a, ṭanpui vartu hnaireng a ni tih hrethar ang u.

THUDIK CHANVE

 Lal Isua ngei pawh thudik chanve-a hruai pen tum phêt Setana hian thudik chanve hi min hruai bo nan hian a hmang dawn tih a chiang reng mai. Ngaih maia dik niâwm taka máwi, mahse belhchiana dik si lo-ah hian thutlûkna diklo pawh kan siam tam tawh ang. Hetiang a nih avâng hian  ringtute chuan kan innghahna tûr Pathian thu hi kan zirin, kohhran kan bêl tlat tûr a ni. Kohhran bel lo leh Pathian thu zir ngai lo, mahni duhdan leh ngaihdan a kal te hi thudik chanve-ah an peng hma ṭhin hle a, fimkhur taka hun kan hman a pawimawh hle.

INṬHENNA

Thil, ṭha taka inbelhbawm tûr, an inzawmna a khîk tawh chuan an nghet tawh lova, keh darh leh chhiat mai an hmabâk a ni. Nu -pa kar a ni emaw, chhungkhat inlaichin-na a ni emaw, kohhran inlai chinna a ni emaw, min thlungkhâwmtu - hmangaihna leh inunauna min tih chhiat sak hi Setana min beih dan a ni. He thang hi kan hriatreng a, kan inunana ti chhe thei thil laka kan invên a ṭûl hle. Tlâwmna nun leh Induhsakna hi inṭhenna thang sût dân ṭha ber te an ni e.

PATHIANIN A TI MAW?

Eden huana hlawh tling taka a lo hman tawh he tactic hi tûn thlenga ringtute beihna atána a la hman a ni. Paula chuan Pathian thu chu Pathian thâwk khum-a pêk a nih thu min hrilh a, Pathian thuin a sawi chu a dik a, kan innghahna tûr a ni a, kan zawm tûr a ni. Pathian thu-a kan innghah tam zawh poh leh nun puitling neiin thlarau rah kan rah chhuah pui tam ang a, he lei-h kan nun-ah Pathian ram a lo thleng dawn a ni.

Kan buan hi kan hriat chian a ngai a, a thang-ah âwk lo tûrin fimkhur takin ringtu nun i hmang ang u!