Mobile/ Computer kan han nei a, a tirah chuan hman a nuamin min tihlim ṭhin ngei mai. Mahse hun a rei deuh a, eng eng aṭang emaw-in kan mobile phone emaw computer chuan virus a kai ta tlat mai a, ‘ka phone hi amahin a thi ringawt zel, ka phone hi a tang tlat’ kan ti a, anti virus hmanga  chutianga phone awmtirtu virus chu kan scan a kan paih chuan chhanhim dan dan a la awm. Amaherawhchu, kan pawisak loha a nih ang anga kan dah ngawt chuan  phone khan a chhiat phah hlauh thei a ni.

Pathian hian ruahmanna fel tak neia a din leh he leia chhan nei a, a dah kan ni. Mahse chu ruahmanna chu tih tlawlh ngei tumin Setana hian ṭan a lo la ve reng bawk.  Kan nun-a Pathian programme - Amah nena leng dun a, inpawl a, hlim taka awm tura programme min siam sak chu lo ei chhiat a, a letling chiah-a min nun tir a, chhiatna tawp thlen tir tum hian Setana hian a virus  siam chhuah ngei mai chuan min bei ve fan a, Pathian antivirus nen lo chuan chu chu thah theih a ni ṭhin lo.

Engte nge Setana virus ni ta ang?

Sum leh pai - Damchhung atan chuan a pawimawh ngei mai, mahse kan nun min ei chhetu langsar ber a ni tlat. Kuttling lova sum lakluh phei hi chu chhungkaw nun chhiatna bul pakhat a ni ngei ang. Sum leh pai kan ûm lutukna avâng hian Pathian lam ngaihtuah miah lo hian a awm theih a ni.

Hmeichhiat-Mipatna

Hmeichhiat mipatna (Sex) hi Setana virus ṭha - nula leh tlangval nu leh pa thlenga a ei chhiatna hmanrua a ni tlat. Sex zungzam-in a ei tawh chuan Pathian hnaih tûrin chakna a nei tawh ṭhin lo. A ngaihtuahna-ah Pathian lam a leng tawh lo. Pathian nen hla taka a awm tir a, Pathian lam hnaih tur chuan beih nasat a ngai tawh ṭhin hle.

Ruihtheih thil (Zu leh Drugs)

Hei pawh hi ṭhalai nuna Setana virus ṭha ber pakhat a ni. A zuna uai tawh tan chuan chhuah leh a harsa  tawh ṭhin hle. He Setana virus hian mihring taksa hnathawk pangngai chu khawih buaiin, thih thlengin mi a ei chhe thei.

Zuk leh Hmuam

Pathian hian hrisel turin min duh a, mahse he Setana virus hian kan taksa Pathian min siam dan hnathawh dan chu a tibuai tlat a ni, hemi avang hian natna kan tuar a, hrisel lo tan chuan Pathian rawngbawl hi a har ṭhin.

Ingaihzawnna:

Mi pangngai hmachhawn vek nisi,s ual ni miah si lo, mahse Setana’n a hman ṭangkai viau si a ni tlat. Inngaihzawnna kawng-ah hian kawppui thlan fuh loh phei chuan Setana thang-ah kan âwkin kan nun kan ti chhe viau thei tlat a ni. Setana hian he virus pawh hi a chhuang viau ngei ang.

Mobile & Other Technological Device

A chiang reng mai!! Thiamna sangzel-in a ṭha záwnga nghawng a neih rualin Setana Virus ṭha tak a ni tih hi. Mihring a ṭha aia a ṭha lo pawm sam leh âwn tlat ṭhin te hi ,ṭhalai ang pawha Inzirtirna neih ngai hial khawpin min sawp leh a nih hi maw!! Kan hun min ei sak a, kan rilru a kuai peng a, kan taksa ngei pawh min chawlh tir lo a nih hi!Tin, sum kan sen nasat zia pawh zep thu cheng lo, mahni pawh han in chhut ila, zawhna min zawt sela, zêp ṭhen ngai kan ni deuh fur lo maw?

Kan sawi bak Setana hmanrua tam tak a awm thei ang; engpawhnise kan lo chhut chhunzawm dawn nia.

 Setana hian a virus hmang hian bi tum pathum a nei ti ila a sual lo ang - Taksa, Rilru leh Thlarau. Heng thil pathum te hi an inzawm vek bawk a, a khawi emaw ber a tih chhiat khi chuan a dang pahnih te hi automatic-in an chhe ve nghal ṭhin a ni.

Physical Effect (Taksa) tihchhiat:-

Part I lamah kan taksa tihchhiat nana a hmanrua kan en tawh a, mihring hrisel lo chuan active taka rawngbawl tûrin harsatna a  nei ṭhin. Hemi hi hre vê rengin kan taksa tihchhiat hi a tum vê tlat a ni.

Pathianin kan dam chhung hun atana min ruat sak pawh thleng zo lovin heng Setana Virus-in a ei, mi tam tak an liam tawh a ni.

Rilru (Mental) Effects :

Setana hian beidawnna min siam sak hi a tum ber pakhat a ni. Beidawng-a min siam tûr hian nuam zawng zawng min kawh hmuh a - Ruihtheih thil, zu leh sa, nulât tlangvalna, party, sawi sen loh khawp thil nuam hi min tawktarh tak meuh a ni.

Le!! kan han luh chilh chiah a le, engnge thleng le?

Pathian-in he lei-a min dah chhan ni miau hek lo le, kan zawn hlimna-in min kian san a, thlamuanna-in min tlansan a, mal-a inhriatna-in min luhkhung ve thung a, lungawilohna khawvel-in min chim buai a, mahni pawh in haw khawp-a min sawp hnuah chuan Beidawnna-in kan lo khat ṭhin.

   Lalpa lama ban phar si lo chuan a tâwpa mahni nunna hial an lo lâk phah tâ a, Setana’n a mission a hlen chiang kher mai.

Thlarau (Spiritual) Nun :

Lal pahnih rawng in bawl kawp thei lo tih hi a dik kher mai. Lehlam leh lehlam ṭham kawp nun hi thlarau nun chak kan nei thei mawlh lo.

Hmana lam ṭhin kha engatinge ka lâm theih loh le? Hmâna ṭawngṭaina nung tak nei ṭhin kha engatinge ka ro tak le? Hmana ṬKP programme ṭhulh hreh êm êm khan engatinge ngâi-ah kan neih tâk? Inkhawm chakna bo ṭhaka ka hun ka hman tâk mai le?

  Setana virus kan sawi tak te-ah khian eng ber emaw khian min ei a ni ngei ang?

Lalpa lam thlauhthlak-a thlarau nun chau taka min siam hi Setana goal a ni miau a ni.

Aw le!! Hun hmasa lamah Setana Virus kan thlarau nun, kan taksa, kan rilru a ei chhiat dan te kan en tawh a, tûn ṭumah ve thung chuan Setana Virus thahna tûr Pathian Antivirus chungchang kan sawi vê thung dáwn a ni.

Ephesi Bung 6-ah hian Sual dona tûra kan ralthuam tûr chu min hrilh chiang hle mai. Thiam angin i han sawi dawn teh ang!

THUDIK KAWNGHREN - Setana hi Dâwt Pa tia sawi a ni ṭhin. Bumna hi a thupui ber a nih avangin dikna hi a hnehna a ni a, kan thiltih-ah dik taka kan tih hi Setana kan hnehna tûr hmanrua a ni. Dikna leh thutaka dingnghet tlat mi kan nih chuan Setana ngamthlemna lakah kan him ṭhin ang.

FELNA AWM PHAW

Setana hian kan fellohna hmanga mi beih hi a tactic pakhat a ni a, hemi lak aṭanga kan invên thiam hi a pawimawh hle. Krista kan rinna avângin Lalpa’n mi fel-ah min pawm a ni tih hi kan thinlungin kan pawm tlat tûr a ni.

REMNA CHANCHIN ṬHA INBUATSAIHNA

Ramthim a ni emaw, kan vêl a ni emaw Setana ram kan luh chilh dawn hian Remna chanchin ṭha kan luhpui a ngai ṭhin. Khawngaihna thûchah kan ken tlat a pawimawh. Setana hian Chanchin ṭha a darh zau zêl hi a hlauh ber a ni a, chuvângin hetiang kawnga che thei lo a, min siam hi a tum tlat a ni.

RINNA PHAW

Pathian kan rinna hi phaw atan kan hmang tlat tûr a ni. Kan rinna siamtu leh tifamkimtu Lal Isua thlir tlatin kan tlansiak kawng hi kan zawh tûr a ni. Setana hian Pathian rinawmna hi rinhlelh tir min tum tlat ṭhin a, Pathian rinawmna hmu thei lo tûra min hruai a tum fo ṭhin. Mahse, kan nunin harsatna a tawh changin a rinawm zia hmu tûrin Lalpa lam kan en fo tûr a ni.

CHHANDAMNA LUKHUM

Krista-a Pathian chhandamna kan chan hi kan thupui tûr a ni. A chhandamna-ah kan lâwm ang a, kan hril bawk ang. Chhandam nih inhriatna hian Pathian hnaih tûrin min ṭanpui thei a ni.

THLARAU NGUNHNAM

Thlarau Ngunhnam hi Pathian thu a ni a. A chunga kan sawi tâk te khi Setana min beihna lak aṭanga kan in vênna hmanrua kan inbel tûrte an ni a, Thlarau Ngunhnam erawh hi chu

 Setana kan beih lêt vê na tûr a ni. Pathian thu-in Setana ngamthlemna hi kan do ṭhin tûr a ni. Pathian thu-a kan din zawh poh leh Thlarau nun chak kan nei thei dawn a lo ni.

ṬAWNGṬAINA

Ṭawngṭaina hi kan Pathian nêna kan indâwr theihna a nih avângin kan thlahthlam tûr a ni lo, Pathian nena ṭawngṭaina kaltlanga inpáwl ngai lo ringtu chuan thlarau nun chak a nei thei ngai lo, Setana’n a awp bet thuai ṭhin a ni.

       Thlarau lama chakna kan neih theih nan sual dona tûra ralthuam kan neih te la ila, a hming maia kristian ni lovin Kristian lukhawng nei nih i tum tlat ang u.