Pathian hmangaihna duhawm tak mai chuan ka nausen tirh atangin min veng a. Zuk leh hmuam, ruihtheih thil lakah hi chuan kei anga fihlim chu tlemte an ni ang. Zu hi ka ka-ah far khat pawh a la lut lova, Dendrite pawh hi ruih tumin vawi khatmah ka la hnim lova, meizial hi naupan laia a bung kan zu ru ve thin a, ka zuk tawh zawng zawng hi zawm khawm ila, tlawn-1 chu a tling ve mahna. Tin, tuibur hi ka pu (C Thanlunga) vawi khat ka hmuam ru a, awi a hreawm ka ti lutuk.Sahdah hi vawi khat mah ka la hmuam lova, Khaini erawh hi chu Mualpui-ah bawm thar hlak ka chhar a, ka hmuam ve ngawt mai a, ka rui chu kan High School bul Sharon kungah ka mu let der mai. Ka sim chiang khawp. Ruih theih chi Damdawi pawh engmah tih ka la nei bawk lo a ni. Kuva erawh hi chu ka ei ve zeuh zeuh mai a, ka ei tawh zawng zawng hi 20 vel a ni ve tawh ang a, ka ka a sen thei lutuk, ka ei thiam hlawl lo! 

         Ruih theih thil,zuk leh hmuam-ah hian hetianga ka fihlim viau chung hian, a ngawl vei ho-in nghei harsa an tih zia hi chu ka hriatthiam pui khawp mai. Mahse, zuk leh hmuam chungchang-a ka ngaihdan ka tarlang ang a, mi zawng zawng ngaihdan erawh a nih ka ring kher lo.

Zuk leh Hmuam hi Sual a ni em?

Pathian thu (Bible) ziah a nih hunlai hian zuk leh hmuam hi tunlai huna kan chin ang hian chin a la ni lo-a 'Sual a ni' tih ringawt hi a theihin ka hre lo. Amaherawhchu, amah hian sual nilo mahse, rawngbawlna min ti thuanawp khawpa min tibuai a nih chuan, sual a ni.

Bible-ah hian Zuk Leh Hmuam nena inzawl tur deuh zirtirna a awm em?

Thil engkim tih ka tan a thiang a, nimahsela thil engkim tih a tha kher lo; 

thil engkim tih ka tan a thiang a, nimahsela eng bawihah mah ka inphal lo. 

                                                                                1 Korinth 6:12

He Bible chang-ah hian Paula hian, thil engkim (zuk leh hmuam pawh) tih a tan a thian thu a sawi. Mahse, thi engkim (zuk leh hmuam pawh) a tan a that kher loh thu a sawi. Tin, eng bawih-ah mah a inphalloh thu min hrilh bawk a ni. Eng bawih-ah mah ka inphal lo tih awmzia hi Bawiha min neitu chuan min a thuhnuai-ah min dah thin a, min thunun thin a, eng thununna hnuai-ah mah ka taksa hi ka hlan phal lo a tihna tluk a ni. 

Zuk leh hmuam-in ka thil rawngbawlna leh Pathian tana ka hun leh ngaihtuahna pek tur min tihbuai fo mai chuan,bawih-ah min nei tihna a ni.Tin a lo-a awm thei lova, min siam hrim hrimna pawh a bawih-a kan awm dan a ni ngei ang. Paula chuan chu chu a duh loh thu a sawi a ni.

Cancer, AIDS leh Hepatitis B-te hi engvanga tihdam theiloh nge ni ang?

He zawhna hi khawvel thiamna dan-ah chuan damdawi la hmuh chhuah a ni ve tlat lo a ni. Mahse, hemi phenah hian thil thuk leh ril zawk zawm hian ka hre thin. 

Pathian in in nih leh Pathian Thlarau nangmahniah a awm reng tih in hrelo vem ni? Tupawhin Pathian in chu a tihkhawloh chuan chu mi chu Pathianin a ti khawlo vang; 

Pathian in chu a thianghlim si a, chu in chu nangmahni in ni e. 

                                                                              1 Kor 3 :16-17

A chunga Paula thuziak khi ziru tam takin an ngaihdan a inang lo hle. A thenin "Pathian in a thih hi 'kohhran'a ni e" an ti a, thenkhati, 'keimahni" ngei hian ti bawk a ni. Kei pawhin, "chu in chu nangmahni ngei in ni e" a tih avang khian keimahni ngei ni-ah ka ngai.

Pathian in (kan taksa) kan tihchhiat avang hian, Pathian chuan natna hmang hian min tichhia a ni ve mai lo vem ni? A mak a sin, Cancer, AIDS leh Hepatitis B kaina chance tamna ber chu Kan taksa kan tihkhawlohna (zuk leh hmuam, sex hmanna)te an ni si a.

Zuk leh Hmuam chu i ngai sual viau ta ni berin ka hria i ti em?

Ka sawi dan-ah khian "zuk leh hmuam' ka support loh zia chu a lang reng mai 

Ni e, ka ngai sual ta viau anga min ngai a nih pawhin a awm tho mai. Mahse, thil engkim tih ka tan a thian si chuan, zuk leh hmuam pawh chu a thiang a ni.Nimahse, ringtu, Pathian hnungzuitu tan chuan a bawiha tan mawlh hi a th a lo a ni. 

Pathian kan rinna leh kan chhandamna min dah bo sak hial turah zawng ka ngai lul lo.Tumah mifel kan awm lo, kei pawh hian nitin sual ti lo mah ila,ngaihtuahna sual zawng ka nei thin. Pathian-ah chuan chumi pawh chu sual a ni si a.   

Pathianin ka nausen tet atanga Zuk leh hmuam ka tihna tur kawng zawng zawng pumpelh theia min siam avangin A hnenah lawmthu ka sawi e