Min vengtu chu Lalpa a ni, tlachhamin ka awm lovang; A thatna dang chuang ngai lo kha chatuan ka ta  lo ni

         Lalpa min hruaina lamtluang-ah hian thil tawn tam tak ka nei ve a, mahse, mite anga han chhuan tur erawh tih ka nei lo. Tun tum-ah hian College ka kal laia ka hun hman dan share ve lawk che ka duh a, ngaihnawmin, bengvarthlak loh mahse, ka tan chuan ka tun hma nun hun hlu a nih ve dawn tlat avangin, ka chhuang a, dawn kir pawh nuam ka ti thin.

           Pathian min kaihhruaina duhawm tak mai changin lehkha zirna kawng-ah rual pawl tawkin ka awm ve a, kum 2006 January thla a lo ni a, keipawhin II BSc ka zir ve a, ka cousin, Apuia leh Ziktea nen Republic Vengthlang Aizawl-ah in (Ka Pi Thuami In) kan luah ve a, ka nun a hlim thin hle a, phak ang tawkin kohhran ka bel bawk a, ka harhvang hle.

Inhlawhna tur ka hmu

          Tichuan, kan chhungkua kan harsa si a, inhlawhna hun kan nei hlei thei bawk si lova, in luah man, ei leh in tur te, ka pa te'n an tum vek ai chuan tiin inhlawhna tur ka duh thin hle a. In sak-ah te inhlawhin hun ka hmang ve thin. Tichuan, tum khat chu Bawnghnute sem-a inhlawhna tur a awm tih ka hre ta a, zing kar hna a ni a, a that dawn viau chu a tiin, Pu F Lalnienga, Republic, Vety Mual, Aizawl te nen chuan kan inberem ta a ni. Zing kar-ah quary atangin vai te'n an lo dah chho thin a, chu chu College Veng leh Venghlui area-ah te ka sem ta thin a ni. 

Ka tah hun a awm thin 

Regular taka thawh a ngaih avangin leh min lo chhawk teh intihna chi a ni lova. Tichuan bucket hring litre 30 dawng- chu khaiin, a tehna tur Pava No nen kawla ni chhuak chhiarin ka bei a. Duhsaktu leh min lainat tu ka va ngah tak em! Tun hnua ka ngaihtuah leh chang hian 'Aw ka tan an va hlu em'. Tichuan, khua hian duhthu a sam reng thei lova, fur khua a rawn thleng chho va, zing thawh chhhuah chuan hrehawm chin a lo awm lo thei si lo. Ka thawkchhuak a, ruah a sur avangin nihliap ka khum a, bucket khai nen no ken bawk nen, ka kut chu a indaih ta lova, ruah chu ka do mai zel a, kalkawng nala ka tluk chang a awm, a va hrehawm teh lul em, ka bawnghnute khai lei chu a buak chang a awm bawk nen, ka inngaihtuah chang chuan ' Aw he hna hi chu aw!' tia ka indawm kun chang leh ka tah chang a awm thin. Mahse, kan inluah man tur tal tia ka ngaihtuah a ngai bawk si a ni. Vawi khat phei chu Venghlui-a ka bawnghnute pe tur ka thu chu ka kekawr mang a lo tet thla hnawk mai a, a kap chu a kaw chiang hle mai a, ka va han zak tak em! Kha thil kha ka hun kal tawh zinga ka zah ber tum a la ni hial ang.  A nuizatthlak bawk a, a rilru nat thlak a, a runthlak hle a ni. Mahse Lalpa chuan damna te, tumruhna te, dawhtheihna te, tuarthiamnate, ka mamawh engkim mai hi min pe a lo ni a, ka lawmin ka hlim em em thin a ni.

         He ka hnathawh ah hian Rs 850- 1500 inkar ka hlawh chhuak thin a, ka tan chuan a va hlu em! Lalpa hnenah lawmthu ka sawi mawlh mawlh thin a ni.

Thutawpna :

                  He ka chanchin hi tunah chuan ka nun tihlimtu leh min chawmtu an ni ta. Damna, Hriselna min petu Lalpa chu fakin awm mawlh rawh se. Inhlawhna min siam tu Pu F Lalnienga te chhungkua leh mi duhsaktu zawng zawngte chungah lawmthu ka sawi takzet a ni

Hringmi nuna thleng thin hi

Kan rel leh ruat a ni lo

Jakoba Pathian ngei chu

Ro min rel saktu a ni

Kan Puithiam Krista zarah

Amah chu kan Pa a ni

Hmangaih tawp lova hmangaihtu chu! Amen