NATIONAL CHILDREN SCIENCE CONGRESS 2025

CSC 2025-ah Mizoram state represent turin thlan kan ni a. Child Scientist Elizabet Zorinpuii nen Aizawl panin December 30-ah kan chhuak a, Dar 1:00PM-ah STAM office-ah thlengin thil tul buaipui ngaite kan buaipui a ni. Sir Zothana, Sir Joela leh Sir Muanpuia ten min lo dawngsawng.

Mizoram Team

Escort Teachers:

1.  Lalmuanpuia, Govt Hrangchhuana HS

2.  Miss Grace Lalawmpui Sailo, Govt Saitual HS

3.  TBC Lalrokimi, Govt Khawzawl MS II

5. FP Laltlankima, Pangzawl

Child Scientists:

1  H Zarzothanga, Khawzawl

2  Deborah Lalnunchami, Lawngtlai

3  Lalhmangaihsangi, Saitual

4  Sarah Lalrinkimi, Kolasib

5  Elizabeth Zorinpuii Pangzawl

6  Ruth Lalthatluangi, Saitual

7  Lalmuanpuii, Keifang

8  Malsawmkima, Aizawl

Kal kawng :

31 Dec 2024 a ni a. Zingkarah STAM Ofice-ah kalin Lengpui kan pan a, tuk thuan kan ei. Dar 10:30AM-ah Indigo Flight -in Kolkotta kan thlawk. Dar 11:40-ah subash Chandra Bose International Airport-ah kan tum. Experience nuam leh hlu tak a va ni em. Van sang-a mu anga leng a, hahdam taka han awm chu a nuam dangdai khawp.

Sealdah Rail Station pan nghalin, Sealdah atang hian Dar 4:50PM-ah Rajdhani Express-in Delhi kan pan a, zankhuain kan tlan. Ka thil ei-in ka pum a tinuam sam lo a, train-a kan chuan lai hian ka nuam sam tlat lo. Kumhlui chu trainah kan thlah a ni ta reng mai. 2024 avangin Pathian hnenah lawmthu ka sawi  e.

January 1, Dar 11:00AM Delhi kan thleng a, New Delhi Rail Station atangin Nizamuddin Railway Station kan pan leh nghal. Nilengin Station-ah hun kan hmang a, kan kum thar hman dan a dangdai khawp mai. Boruak a vawt suk mai bawk a, hmuh apiang thil thar leh nuam tak a ni zel e. Vai ram-ah chuan New Year te pawh a danglam chiamin a lang tlat lo.

Zan Dar 8:40PM-ah Bhopal panin Bhopal Express-in kan chhuak leh. Chhum zing avangin delay a nasa a, January 2 zing dar 5:30 a thleng tura in ngai kha 09:30-ah Bhopal kan lut chiah a ni.

Hei le, Bhopal.

Oraganising i/c Transportation Rel station-ah min lo hmuak a, kan thlenna tur OYO Hotel The Shloka kan pan nghal. Hotel changkang tak ni lo mahse, ka tan erawh experience thar zel a nih avangin ka enjoy viau zel mai. Tlailamah Sir Muanpuia leh Miss Grace te nen CSC hmun tur Ravindra Bhawan-ah kalin thil tul ngai kan ngai chang.

CSC 2025

3 – 6 January 2025

India ram pum Science intawhkhawm lian a ni bawk a, programme a lianin, mit ti tlai leh ngaihtuahna la thil pawh a tam thin. A tan ni-ah hian Cultural Day hman a ni a, mit leh beng a tlai hle.

4 January zan-ah keini pawhin Cultural Dance – Chheih lam kan entir a, a nuamin, lawm pawh a hlawh hle. Kan traditional attire hak chuan kalkhawm a hip hle a, kan naute pawhin thlalakpui an hlawh hle.

Technical Session

Kan naute pawhin ni 2 chhungin Project presentation leh display an nei a, nuam an tiin, an display pawh pan leh zawh an hlawh ve hle. Competition ang tak tak a ni tawh lem loh avangin boruak a zalen a, child scientist te pawhin hun zalen leh hlimawm tak an hmang tlang a, Unity in Diversity principle kan hmang tha viau mai. Project tha tak tak hmuh tur pawh a tam a, Mizo leh vai kan danglamna pakhat chu Presentation skill kan inneih thar hleih deuh. Kan boruak hap dan a inang lo deuh a ni.

Nitin Hotel atangin Bus-in kan kal a, Lakshadweep leh Puducherry lam unaute nen kan chuang thin a, an felin an hospitality pawh a tha ngei mai.

4 January 2025

Presentation pek kan zawh hnuah Tribal Museum kan tlawh. Bhopal hi India rama Tribal tamna hmun an ni a, an thil hlui display na hmun hi tlawh  a man hla tak zet. Artist naupang te Rita Shurya kutchhuak leh amah kan hmu bawk a, naupang te ni siin a kut chhuak a mawi ngei mai. He hmunah hian Bhopal Mizo Welfare hruaitute nen kan inhmu bawk a ni.

5  January 2025

Vawiin hi Sunday a ni a, Vairam-ah zawng Sunday a dang khawp mai. Thil engkim ni dang nen danglamna a awm lo. Van Vihar zoological Park leh Upper Lake dil mawi tak kan tlawh a, mit a tlai a, thinlung a hlim veng veng a, experiences nuam leh hlimawm tak a ni. Pathian thil siam mawi tak hmuh hian thinlung a tihlim veng veng a ni. Lalpa ka lawm e.

6 January 2025

Science Congress a tiak ta a, Dinner ei khamah Bhawan kan chhuahsan. Zan tir Artificial light hnuaiah kan tlan a, Lower lake kam vel kan tlan chuan lung a tileng veng veng mai. 7:45-ah Bhopal JN kan thleng a, Train RKMP express -in Dar 10:50-ah Delhi panin kan chhuak. Uttarakhand Team-te nen kan chuangho a, kan naute nen an inkawmin nuam an ti tlang hle.

7 January 2025

Dar 10:00-ah Nizam Uddin Rail Station kan thleng. Mizoram House-ah kan tlang nghal. ‘Mizo bai’ a chungchang fiamthua sawi mai thin hi a lo dik thei viau mai. Chaw ei khamah site visit neiin kan chhuak. Vanneithlak takin, kan RS MP, Pu Vena’n ruahmanna min siam sak a, Parliament in hlui leh thar kan luh chhuak, Darkar 2 vel lawih hemi atan hian hun kan hmang. Security a tight rem rem hle, India ram rorelna sangber hmun hmaa tual len chu a nuamin, feeling of pride kan nei thei hial a ni.

Red Fort-ah kal lehin kum 1639 vel-a Shah Jahana te ho kut hnu a taka zuk hmuh chu a va han nuam dangdai em! A bawn hi a ni tawp mai, a chhung erawh kan lut hman ta chiah lo. Tourist pawh a hip tam ngei mai.

Indian Gate kan kal a, a chhung tak erawh kan lut ta chiah lo. Waste to Wonder kan va kal leh a, thil hlui chhia hmanga Taj Mahal, Eifel Tower, Christ, The Redeemer, Coloseum lem an din chu hmuh a nuamin, an creativity that zia kan hmu chiang hle.

Zanah Miss Numami chhungte delhi-a in beng bel tawh te inah chaw kan ei. Kan haw lam Taxi-a min phurtu chuan kan tawng a lo hrethiam lo niin, Aizawl-ah 1990 velah mechanics in a lo awm tawh a lo nia. Uber Taxi sing tel-a, Uber System-in min her chhuah sak chu A mak dang dai ve tlat.

8 January 2025

Lotus Temple leh Qutb Minar kan tlawh leh. Kum 1311 vela Qutab Ud-din Aibak te ho kut hnu hmuh chuan mak tihna min siam leh thin.

Delhi kan chhuahsan

Zanah Rajdhani Train-in Dar 06:30-ah Delhi kan chhuahsan leh a, Delhi-a kan hun hman pawh a chhinchhiah tlakin Pathian hruainaa CSC 2025 zara kan chan hi a ropuiin, a vanneihthlak takzet a ni.

Kolkotta-ah hian nileng hun kan hmang a, Mizoram House-ah invawm lutin, Tlaiah kan bazaar.

9 January 2025

Dar 01:30-ah Indigo flight-in Kolkotta kan chhuahsan. Dar 02:20PM-ah Lengpui kan thleng.

STAM hruaituten min lo hmuak

Office-ah STAM hruaituten min lo hmuak a, V Pre Pu Hmukima’n hun a hruai a, CSC Review meeting kan nei. Kan naute ho pawh an inngaina-in an in ngai viau mai. Hun tha takin kan hmang.

Meeting zawhah hian Eli leh a pa, U Kungtea nen Pangzawl panin kan chhuak leh nghal a, Dar 11:00PM-ah inah kan lut leh ta a ni. Ka damchhunga ka zin thui ber a la ni rih ‘Kolkotta – Pangzawl, nikhatah. Ka ngaihtuah chianga a va mak tak.

He kan experience hi a hlu a, ka hun tawn a hlimawm a, ngaihtuahna thar tha tak min siam sak bawk a, ka lawm em em a ni. Lalpan min hruai a ni tih ka hriatna hian min tilawm leh thin.