30 July 2018

Vawiin TKP Day denchhen-a Bial TKP in unit tin te Social Work nei tura ruahmanna a siam angin kan unit chuan area-a school pahnih awm te tihfai hnatlang thawh nise tiin kan rel a, he school pahnih hi Kum 1993 - 1999 chhunga ka nitin hun hman ralna a nih avangin ka thinlung hian a theihnghilh ngai dawn lova, TKP Day pual ni bawk, ka school hlui pual ni bawk a, thu han dah rilru in a chak tlat mai.

A Aw B zawng Balwadi leh Anganwadi-ah te kan hre bel ve tawh a, Gov't P/S - IV Pangzawl-a sentence tluantling ka chhiar thiam tan tirh lai kha ka la hre ruak mai. Kha stage tak kha chhiar thiam ka nih bul tanna a ni a, lehkha chhiar kha nuam ka ti takzet a, phurna nasa tak ka nei nghe nghe a ni.

He school ah hian -

Pu C Lalena (L)

Pu H Thanthuama (L)

Pu K Kaitluanga

Pu K Lalrinsanga (L)

Pu Rosanga Sailo te kan regular teachers an ni a, Class-III kan nih kumin Pu Sangtea hian Aizawl lam nula, Miss Chhani a ruai lailawk tum zawk a awm bawk.

Kan zirtirtute hi upa lam an ni ve deuh vek tawh a, service-na rei tak an ni hlawm tawh a ni. Hmanlai zirtirtu tih takah an hna-ah an inpe takzet a, naupangte han chhawnchhaih leh thiltih pui lamah chuan an hnufum tawh deuh na-a, an inpekna leh tihtakzet-a an service an thawh kha tun hnu-a ka ngaihtuah hian ka ngaisang thar takzet a ni. Regular takin Punctual takin nitin school min kai pui a, Class IV kan nih kum phei chuan Naupang Kum 10 rual lek lek kha Study Camp min neih puiin school-ah min riahpui a, an inpekna kha a va ropui tak em!! Zirtur tam tak min hnutchhiah a ni.

Class I kan nih laia ka hriat reng thil pakhat chu Sir C Lalena hian Drawing Period a rawn la a, Rawng chi hrang hrang ziak turin min ti a, Tawka, Ak leh Zum chu ka thai kim thei mai a, tial lem erawh ka thai pum thiam meuh lo mai a, rei ngial ka thiante an haw vek hnuah kan thu khawtlai a nih kha, tun thleng hian ka zirlai leh thil ilo-a lem siam a ngaih hian kha hun kha ka hrechhuakin ka ngai ngawih ngawih thin, kan zirtirtute khan kan thiam lo ang tih hlau em emin theihtawpin min enkawl a ni tih hi ka hrechhuak thar fo thin.

Devotion an ngai pawimawh em em a, kar tin thawhtanni leh zirtawpni-ah kan nei ziah a, thiante ho 'tunge tawngtai laia meng zawng sawi rawh le' an han tia, thian thenkhat han sawi ta char char te an awm nawk a, an men ve tho vanga sawi thei an nih avang khan hremna chi khat an han tawng chho tlang vel phei kha chu nuam tak a ni, an ti zing viauna khan naupang na na na chu kan lo fing mawh khawp, awhna ngaiah kan awk fo mai.....

1996-ah Primary School Leaving Certificate Result a chhuak a, khalai khan engti dan nge ka hre lova, Result kha Ramrikawn Pu LP Hrangmana te bangah an tar thin a, kan zuk kal a, ka passed ve hlauh mai a, ka lawm zia kha, Middle School kala Form thar hak kha ka chak ve em tawh a ni. Kan thian hova kan hlim thin zia leh kan in-um a, Japan-hlo hmun kan bawhbel tih vel dan zawng zawng kan ziah chuan a tam dawn em mai, hun hlimawm leh nuam tak zawng a ni. Rilru-ah enghelh engmah nei lova hun kan hman thin zia te kha,,,, aw ka ngai thin takzet a ni.

GOV'T PANGZAWL M/S - II

Kum 1997 - 1999 chhung he he hmunah hian ka nitin hun ka hmang leh a, thil thar leh nun phung ka zir hnemin ka nun-ah experiences ka va ngah tak em!!

Kan kal hun lai hian kan school hi Pangzawl veng hrang hrang atangin kan pankhawm tak meuh a, Khawngbawk , Ramrikawn te pawh a tam zawk chu an rawn kal thin a,he school-in a thlen san lai ber tiin sawi ta ila, ka tisual tamin ka ring lo.

Sir C Laihnuna (Retired)

Sir C Lalrokima (Voluntarily Retired)

Sir V Rotluanga (Headmaster M/S-I)

Sir R Thanchungnunga

Sir Chalzika Hmar (Retired)

Sir R Laldinliana (Headmaster Gov't Venghlui M/S, Aizawl)

Sir Kaptluanga

te kan zirtirtute an ni thin a, an ni hi chu an service vanglai tak kan tawng fuh niin ka hria, an efficient em em a, thil sawifiah an thiamin min ti phur thin em em a, hlim takin chak takin nitin school ka kal ziah thei kha anmahni vang a ni tih ka chiang a ni.

1998-ah khan Mizoram pum huap-a hla phuahthiam hriat hlawh Sir Madinmawia (Sir Dina nau) chu a lokal ve zawk a, naupang bula awm nuam a tiin min chawk phur thiam em em mai a, World cup kan players kan tan te min han zawt liam liam a, chhinchhiahin Hmunphiat tur list a typa-na ah kan sap hming atan a han chhu kai ngei a, kei pawh, Batistuta F Laltlankima ka han in tih ve ngei kha,,,,, A va han nuam bawn tak emmmm,,,, Pu Madinmawia hi ka ngaina em a, zan tam tak an in-ah hian ka riak nghe nghe a, an inhnuai-ah hian lehkha te zirin hun engngemaw chen chu ka awm thin nghe nghe........

Chowkidar Efficient em em mai Pu C Dohranga (retired) ken nei bawk a, naupang te School chabi a kawl tir thin a, Classroom chabi kawl kha ka chak em em pek a, ka'n dil tawp a, hun rei fe chu Classroom chabi kawlin Room kawngka kalh leh hawn kha ka hna a ni. Mahse, kal hma zel a ngai erawh kha chu ka inchhir tep.....

zirtirtute tirh nih kha ka'n chak leh thei khawp a, naupang an mamawh em tih hi ka thlithlai fo thin a, kuva leia min tirh te khan thleng hma min ti se tih ngaihtuahna nen chak mangkhengin ka ri vawn vawn zel a, ka khawvel kha min thuam ve takzet a ni.

Sertawk-a inkhelh te, Ball vawm hmanga inkhelh te Ring theh te kha a va nuam tak em!! Aaaa Sawi tur a tam em mai, ka duhtawk dawn ang. Tum khat Classroom-a marble ka pet chu pheikhawk ka bun si lova, ka ke chhip a ri chawrh a, ka han en chian nak chuan chhuat sement khuar-ah ka ke zungpui ka lo chhuih hi a lo ni a, ka ke tin a thlawn hlawk a, a rawn to tha thei tawh der lo, tun thlengin ke zungpui tin bi-boh deuh ka neih phah,,,,,

M/S ka kal lai hian zirna-a thahnemngaihna leh tuina ka zirtirtute hian min tuhsak tlat a, tui takin hrehawm ti miah lovin lehkha ka zir a, Class VIII hi 1999-ah khan II Div-ah ka passed a, Class IV ka passed ang thovin H/S kal chakin ka hlim em em a ni.

Ka zirtirtute, ka nun min siam sak turin theihtawp an chhuah tak meuh a, hmangaih takin min enkawl thin a ni. Ka tan hian an hlu em em a, ka la hrechhuak dawn chauh a nih hi.... Ka lawm tak zet a ni.....

I love you, all my dear teachers........