Pu R Romawia superannuation Pension thlahna

Thiltih tur awm reng reng a rang thei angbera hlenchhuak thin mi a ni a, a kutzala tla, hna awm reng reng a tawlh khawtlaipui ve ngai lo a, um dawr dawr ngai khawpin ka thlawp zawh loh chang pawh a tam. 

Sikul thatna tura a thaber duh thin a ni a, hmasawnna awm theihna kawng hi a mitin a hmu a, a theih ang tawka thain chu hmasawnna chu nei turin  a bei thin.

Midangte hlawhtlinna a hmuh hmaih ngai lo mai ni lovin, a lawmpui thiam a, chu hlawhtlinna phenah chuan amah a awm ve reng tih hriatloh khawpin midang a chawimawi thiam thin. 

Amah fakna tur hian hmun leh hun hian a daih seng chuang lo. Mimal takin kei hian ka ngaiin, ka ui a, min la awmpui zel turin ka duh ngawih ngawih a, theih a ni tawh bawk si lo.

"Zirlaite avang chauha ka hna hi nei alawm ka nih, ka hun tawpah hi chuan ruai eiah ka telh lo thei lo' tia a sawi hian zirlaite a ngaihhlut zia leh a ngaihpawimawh zia a ti lang a, zirtirtu quality duhawmber chu amahah hian a inthukru chiang alawm. 

Zirtirna hna a thawh dan

Sir Mawia hian kum 1988-ah Tlabung khuaa Deficit sikul lamah zirtirna bul a tan a, 1994 ah  regular-a lutin Govt Thingfal High School-ah a thawk a, kum 2004-ah Govt Pangzawl HS -ah hian a rawn lut a ni.

Thlahna hun

Sir Mawia thlahna hun hlung takin kan hmang a, Kan former headmaster 2, Pu R Zozama leh Pu C Malsawma bakah LDC Retired Pu J Lalramzauva, Peon Retired Pu F Aizama leh Pi Marovi w/o Sir R Lalbiaktluanga, Sir Lalruatsaka, Former Lecturer, PSSS ten programme min hmanpui bawk a ni.

A rawn lang a, a theitawp a chhuah a, a chhuak leh ta. A ni ngei hi zirtirna hna kaltlanga Pathian betu chu a ni e.

Sir Mawia, en tawn tur min hnut chhiah tam tak te, entawn leh i hniak rawn rap vein theitawp kan lo chhuah zel ang a, hma sawn zel kan lo tum ang.

I hma hun kal zel turah duhsakna sangber ka hlan a che.