25/10/2017  

Thihna kotlangah tia a thupui ka dah hi, ka nunin thih hlauhawma a din tawh zingah chuan ka hriatchian ber leh ka ka experience thar ber a nih avangin ka han ziak a ni.

      Ni 15th April 2012 hun a lo inherchhuak a, he ni hi Pathianni a ni a, tihtur tul ang ang tia inkhawmna leh Zaipawl hla zir kan neih zawh ah chuan, Evangelical Cell hmalaknain Chawnghei Tawngtaina neih tur a ni a. Kei pawh Mami nen kan kal ve a, kalkawngah chuan inti fit tak hian ka zuan san zia te ka han show vel a. Biak In kawtzawl-ah thiante an lo awm diah avangin Biakin chhungah chuan kan lut bik lova, kawt zawl-ah chuan kan che tla ve ta a. Mami chuan Tawngtai Dar chu a han khawng a, a thiamlo em em mai leh nghal.

​THIHNA KOTLANG-AH

       Chutia a vuak zawhah chuan, eng ka ti nge pawh ka hre lo. Dar en tumin Dar Khaina-ah chuan ka han lawn chho va. He kan dar khaina hi cement-a siam niin Feet 15 vela sang a ni a, he dar khaina atanga feet 1.5 velah Electric hrui pui a kal a, dar ka en zo ka han chhuk thla leh tur chu,ka thiante chuan "i in mantir ang e aw!" an lo ti a, chumi zawhah chiah chuan, ka ban ka thlakthla chuan chu current line tak maiah chuan ka kut chu ka bat ta tlat mai a, Kan lehkhazir laiah chuan Current hian magnetic field a nei tih kha kan zir tawh kha a ni a. Ka kut dinglam chuan current hrui chu ka hum ta a,thlah rual loh hian current Magnetic Force chuan min pawt bet ta a,ka taksa chu a shock chhuak hneh ngei mai. Current-in min manna hi lei atanga feet 7 vela sang vel a ni a, ka kut veilam chuan Dar khaina-a vawnchhan  Iron rod ka vuan a, ka tan tihtheih a va awm lo em. Min man tirh hian "a na, a na" tiin vawi hnih ka au va, chumi hnuah chuan tawngchhuak thei ka ni tlat tawh lo. Ka thiante leh Mami te chuan a tirah chuan ka tifiam mai mai emaw an lo ti a, min lo ngaihsak hma em em lo.

     Ka rilru chu a harh fim vek a,' current hian min man ta chu a ni si a, ka tawp hun a ni dawn tawh a nih hi, LALPA, i kutah ka innghat e' tiin ka tawngtai thei tlat, ka thih hun tur ka nghak a ni tawh ber mai, ngaihtuahna ka sen leh chu, current -in min man lai hian chapal ka bun a, ka ke dinglam chuan Current hrui chu min hipna ata rah phawng theih turah ka ngai a, ka tlawh ve tak na in, tha ka nei lo, current-in min hipna force chu a na lutuk a,ka kut khan mumal a nei lova, Wire atang khan lo in pawt phawi thei dawn pawh ni ila, eng direction-in nge ka phawi ang tih ka hre thei lo hrim hrim. Ka mit a thim a, ka meng lo, ngaihtuahna erawh fim takin ka hmang thei tlat.

    Second 45 vel khat vel current in min man hnuah chuan ka thiante chuan theihtawpa min pawh thlak an tumna chu an hlawhtling thei ta a, ka awmna hmun atang chuan dawmtu nei lovin ka tla thla ta hnawk mai a, vanneihthlak takin ka mawng lam ka zuk insawh hmasak avangin na ka nei lo. Chumi hnuah chuan thiante chuan min nuai nawk nawk a, ka normal leh thei ta a ni. Ka kut vei lama Rod-a ka invawn tanna kut zungte hi  a kang a, a sa ve hem hem mai.

    Min pawtthlatu ka thiante (U Faka, U Rov, U Mawitea, U Chuauvaleh Mami) kha awm lo sela chuan keimah mai chuan current-in min hipna force kha lehkhalh rual a ni lova,  thih chauh ka hmabak a ni tih a chiang hle. Mahse Pathianin min la duh a ni ang e, min chhantu tur  a lo dah a, ka lawm hle mai. Thihna kotlanga ka din laia Pathian hnena ka inkawltir kha ka thlamuanna leh ka lawmna a ni.

Current-in thlah rual loh va min man ang mai hian mi tamtak hi Setana hian a man a, chhuah duh mahse,an chakna chuan an thei lo a ni tih ka hrethiam-in ka inhria.

Tawngtaina:

LALPA duhtak, ka nunna chaklo tak min ven sak avangin ka lawm e. Thihna hlimkawr zawh mah ila nang ka kiangah i awm avangin ka hlau lovang. Ka nunna mi humhim sak avangin ka lawm e.Ka damchhung hun rei lo te-ah hian i tana theihtawpa tang turin min pui ang che. AMEN