Naupang enkawl hi ka thiam vek tawh e tih theih tur khawpa awlsam a ni lova, a har em mai tih avanga thlahthlam ngawt chi lah a ni si lo. Nu leh pa tam takin kan fa kan enkawl dana kan tihsual fo thin kawng 7 - an inrintawkna tichhe thei te kan zir ho dawn a ni.

1 Mawhphurhna pumpelh tir
Naupangte kan khawngaih leh duat avangin an hrehawm kan phal lova, an tihtheih tur mawhphurhna kan pe phal lo fo thin. Naupangte hi an kum upat ang zelin an taksa, rilru leh ngaihtuahna-in hma a sawn a, an tihtheih tawk ang zel-a mawhphurhna pek thin hian mahni inrintawkna a siam zawk a ni.

2 An che sual tur kan veng lutuk thin.
Kan fate che sual hmuh hi chu thil hrehawm tak a ni e. Nu leh pa tam tak chuan kan fate che sual tur chu kan veng lutuk thin a, an chet sual hmain kan lo ven pui vat thin. Hetia kan lo venna hian an chet sualna atanga an thilzir chhuah ve tur kan chhuh sak tihna a ni. Hlawhchhamna hi zirtirtu tha tak a i thei tih kan hriat a pawimawh hle.

3 Chhuanlam kan siam dik lo thin.
Kan faten school shoe an mamawh a, 'Keini chu kan rethei em mai a, duh duh hunah a thar kan nei ve thei hleinem' tia kan chhan hian kan fate-ah kan dinhmun hi kan thunun theih piah lam nia ngaihna a tuh daih thei. Mahni inkhawngaihna tuh sak lovin, an problem solve turin an tih theih tawk kan tih thin tir a pawimawh a, an mamawh an neihna turin engnge maw thil han zawrh tir te pawh a pawimawhin hei hian an nakin hun zelah puitlinna a siam fo thin zawk a ni.

4 Kan khuahkhirh lutuk thin.
Naupang an che vel tur kan khuahkhirh lutuk hian an thil zir tur tam tak kan chhuh sak a,an hmasawnna tur kan dal tih hriat tur a ni. Nu leh pate chu vengtu ang ni lovin Kaihhruaitu ang zawkin kan awm tur a ni. An thil tawn zela insiamremna thiamna leh mahni inrintawkna an neih theih nan hun tha kan siam sak tur. A ni.

5 Rilru sukthlek danglam laka ven pui.
Hringnun chu hlimna-in a khat vek thei lo a, kan duhzawng chauha hun hman theih a ni bawk lo. Kan faten an thil tawn a zira rilru danglam (etn - thinrimna,lungngaihna, hlimna, lawmna, tihtauh,etc) an put hian enkawl thiam a ngai hle. A thiante laka a lungawilohna vui puia hnek let ve tur alawm kan ti a nih chuan a puitling thleng pawha kawlhrawng takah kan chan thei. Engvanga kha harsatna kha nei nge engtianga chinfel tur nge tih-ah kaihhruaina tha tak pek a ngai zawk a ni.

6 Famkim beiseina.
Kan fate-ah han fel famkim kan phut emaw tih mai tur hian beiseina kan nei sang fo thin. Beiseina neih san chu a tha, mahse a leh lutuk erawh chuan nghawng tha lo zawk a neih thei thung a ni. Kan beiseina erawh kan fate kan hriattir tur a ni.

7 Thunun lovin kan hrem thin.
Naupang thunun leh naupang hrem tih hi a danglam. Naupang kan hrem chuan 'Kei chu ka sual a ni' tihna rilru an pu a,kan thunun chuan 'ka tisual a ni' tih rilru an pu thin. Thununna chuan naupang chu a hun kal zel atan fel leh tha zawka che turin a pui thin. Hremna chuan naupang chu thil tha leh dik ti ve thei tawh lo angin a inngaih tir thin.

'Naupang chu a kalna awm kawngah chuan zirtir ula, A upat hun pawhin a thlah lovang' Thufingte 22:6