Kristian chhungkua leh Fa enkawl

      Ṭum khat ka khawlai kal chu tlangval zu rui pahnih an lo insual a, nu pakhat hian tlangval pakhat zawk chu lo dangin, “Mama, ti ve suh, haw ang, haw ang’ tiin thei leh thei loin a kuah hram hram a, a fapa chuan ‘min lo dang suh ka ngam alawm, khawnge ka’n hnek teh ang’ tih pahin chu nu a kuai thlu tawp mai a.

        Chumi te nufa khawvel chu a va thimin a va râwng tak êm!! A nu khân a naupan lái khan E Mama, ṭap tawh suh! A nat loh kha, ṭhiante nên an intibuai ngai lo, tih an tum che pawhin ‘ka cho lo che’ tih zêl tûr tiin lo fuih ni zâwk sela, khitiang khi an pumpelh ang em le?

  Kristian Chhungkua-ah chuan Member zawng zawngte hi Pathian hmangaihna-in an inthlung zawm vek a ni. A tu ber emaw khian Pathian zawm lovin midang zawng zawm mahse, a kalh a kim loh avangin kristian chhungkua a tling lo a ni.

 KRISTIAN CHHUNGKUA CHU PATHIAN THU-A INENKAWLNA HMUN A NI

Fate-ah hian chi nung tuh kan tum tlat tûr chu Pathian-a rinna leh ṭihna nun a ni. Hemi bosal khawp-a fate kan enkawl a nih chuan lei-ah pawh hian ‘Hremhmun tla fual’ kan lo siam ve reng thei a ni.

 ENGTIK AṬANGA ṬAN TÛR NGE?

‘Kan fate hi tih an harsa-in kan thunun thei tawh lo dêr mai’ kan tih chuan khua kan lo tlai deuh tawh tihna a ni. Fate Pathian thu-a kaihhruai hi hnute an hnêk lái aṭanga bul ṭan daih tawh tûr a ni.

Pathian thu a daw ve ngai lo tih hi ka ring a, ’Naupang chu a kalna âwm kawngah chuan zirtir ula, a puitlin hun pawhin a thlah lo ang’ tih hi a dik chiang a ni.

 PATHIAN HNAIH LOIN FATE PATHIAN A HNAIH TIR THEIH LOH

Eshopa thawnthu lar tak pakhat - Chakai nufa kal dan inzirtir kha kan hria ang - A nu-in i kal pei hê lutuk, i zei lo ṭiang ṭuang a ti chu a naute chuan ka nu ‘nangmah kha kal dik phawt la, i kal dânin ka lo kal ve ang’ a tih kha. Fate hi kan awmdan ni lova hruai phêt tum hi thil harsa tak a ni.

 PATHIANIN ENGKIM A TI THEI

Pathian nêna kan ṭan kawp a ngai hle! Kan fate enkawlna-ah hian an chhungril nun khawih thil a nih avangin Pathian-in hna a thawh a ngai a ni. Chuvang chuan ṭawngṭaina-in Pathian nen kan thawkho tlat tûr a ni. Fate khawlohna leh harsatna pawh hi engkimtithei Lalpa hnêna kan kûn pui tlat chuan chhanchhuahna an chang ngei ang.

 HLAWHTLINNA LALPA KUT A NI

Psychological Education-ah chuan naupang phûrna hi chhunglam aṭanga an neih sa (ṭhahnemngaihna) - Instrinsic Motivation leh Pawn lam aṭanga kan pêk theih (Extrinsic Motivation) te a awm a.

 Chhunglam PHÛRNA hi Pathian hnên ami a ni ka ti tlat. Kan siam chawp phûrna âiin a ril a, a daih rei a, Zirna kawnga phûrna pawh hi. Lalpa hian a díltu te a pêk ngei hi ka ring tlat a ni. Kan fate pawh hetiang tûr hian i dîl sak fo ang u. Lalpa hi engkimtithei, Engkimneitu a ni. A mite tan thil ṭha a ui ngâi lo.