Mihring hian zia chi hrang hrang kan nei. Zia chi hrang hrang awmte hi sawi kim pawh har khawp in a tamin, ze khat ringawt pawh hian zir chian chuan kawng hrang hranga then tet leh theih a ni bawk ang. Kan zia-ah hian thenkhat chu tha kan tih em em te an nih laiin, tha kan tih lem loh zia te pawh hi a awm tho awm e. Mihring ze hrang hrang - Zaidam, thinchhia, dawhthei, fekfawn, chimlim, tlawmngai, hlim thei, nunnem, inngaitlawm, adt hi kan nunah hian a bet tlat a, engtianga he zia hi nei nge kan nih tih erawh chhui fe tham a awm a, kawng hrang hranga sawi theih a ni bawk ang.

1.  Inthlahchhawnna : 

'Sial rangin sial rang a hring' tih thufing mizo in kan neih hi a dik hle. Kan zia tam tak hi Inthlahchhawnna atanga kan neih a ni a, kan nu leh pate atang hian gene (chi-a Inthlahchhawnna) atang hian zia engngemaw zat kan chhawm a ni. 

2. Inchhungkhur Inenkawlna :

Inchhungkhur-a kan inenkawl dan hi kan zia siam tu pawimawh em em a ni. Naupang lo thang lianin a duhzawng, tui zawng, hlut zawng, ngaihsan zawngte hi chhungkaw inenkawlna hian a hril thui hle a ni. 'Chhungkua chu zirna hmasa ber a ni' tiin sawi a ni thin a, 'Bul tan that chu a zatve zo tluk a ni' tia thufing sawi a awm bawk a, hei hian chhungkaw pawimawh zia a ti lang chiang hle. 

3.  Tual lai nun/Thian te:

Naupang hun kan hmang zo a, tleirawl/rawlthar nun kan kai chho chiah hian, pawn lam thil-in kan nun a rawn luah chho leh a, kan thian kawmte atangin zia kan zirin, ngaihsan zawng, hlut zawng kan zir leh a, kan thian kawmte chuan kan nun nasa takin min ei ve leh ta a, kan thiante kawm a dik chuan ze tha kan neihna chance a tam thin. A fuh loh chuan ze chhia-in min hmuak tihna a ni ang. 

4.  Kohhran thiltih :

Kan nuna nghawng nei lian leh tak pakhat chu Kohhran a ni. Kohhran kan nun atana thil tha leh nun dan dik kan zirna hmun pui ber pakhat a ni. Naupang te kan nih lai atanga Kohhran belh hi nun puitling neihna kawng leh mize tha neihna tura thil pawimawh tak a ni.