KNP KHUANGHLUM UNIT

Kum 2024 Mizoram pum KNP Short Film Intihsiakna, Top 10-ah kan lang.

Hetah hian video a en theih.

Hetah hian a en theih e Video Link

EXERCISE SCENE

Duata chuan exer a la a, chutih lai chuan an zirtirtu-in riddle a pek 2T = H chungchang te chu ngaihtuahin hlim takin a tlan a.

Zirtirtu : Vawiin ni-ah hian, riddle ka pe dawn che u a, mathematics hmangin emaw, Science hmangin emaw, Arts hmangin emaw, Drawing hmang pawhin engtiang pawhin, a intlukna zawn chhuah in lo tum dawn nia. In riddle chu hei hi a ni.

 2T = H.

 In a thleng a, a nu hnenah kalkawnga a pangpar lak chu a pe a.

Duata   : Hi ! (Pangpar a pe a)

Nu           : E he! Bawihte, a va mawi ve! Ka van lawm tak…. I hah em?

Duata      : Hah lo ve.

Nu           : Lo thu rawh.

-----------------------------------------------------------------------------------------

TUAL PHIAH SCENE

Hruaii     : A u, khawilai thleng nge i tlan thin?

Duata      : Saw tah..Chite peng thleng, a chang chuan Leitan pawh ka thleng fo.

Hruaii     : A ni maw! I va’n tlan thui thei em em! I exer lakna a rei tawh bawk a, I fit tawh  ngawt ang. Pathian paw’n mal a sawm ngei ngei ang che.

Hmun an phiat zo a, inah an lut a.

Nu           : E in zo tawh maw! Lo thu rawh hahdam rawh u… Thingpui kan siam ang e.

------------------------------------------------------------------------------------------

TUK THUAN EI  SCENE

Pa            : Bawiha, Mami, I nu nen pawh kan lo sawi dun thin a, in nungchang hian min ti lawm  thin khawp mai. In puitlinna tur a nih chuan engpawh tih kan huam a nia, hna pawh  kan thawk zel ang, taima takin in hmaa tihtur   awmah theihtawp  In chhuah zel ang a, Mi taima te hi Pathianin mal a sawm thin a nia.

Nu      : Chuan, unau inhmangaih tur ania, unau inhmangaih leh inkawmngaih  te hi a  zahawm ngai.

Pa            : Ro thil ropui leh sum engmah hnutchhiah tur che u kan nei lo ang. Mahse, rozawng zawng zinga hluber hnutchhiah che u kan duh chu  ‘Pathian tihna’ hi a ni.  Harsatna kan neih chang pawh hian Pathian hi kan  ‘First Aid’  tur a ni a, mangan laia        tanpui vartu hnai reng a ni tih in hrereng dawn nia.

Hruaii     : U, taka! vawiin kha dar engzatnge final kha?

Duata      : Dar 1-ah ania, ka zam ve det.

Hruaii     : Theihtawp I chhuah dawn nia. Pa, vawiin chu school-a Felicitation Programme hman zawhah thianten “Mat-ah picnic ila” an tia, ka kal ve  dawn aw.

Nu           : Mate, chawhnu chu lo-ah thlai min lakpui la ka lo tia, I pa nen rem kan lo  ruat a si.

Hruaii     : Aaaa.. Nu, ka kal ve chak asin…..

-------------------------------------------------------------------------------------------

SCHOOL KAL LAI

Duata leh Hruaii te unau chuan School an kal a,  ‘ka tan Lalpa a tha’ tih hla an sa dun rat rat a.

Pangzawl PHC- a doctor Dr B Malsawmsangi a lo thleng a, an unau chuan  eng nge maw chen an thlir a.

Hruaii     : U Doctor ka ni ve chak e, an smart thei sia, ni ve ila chuan doctor form te hi ka inhmeh ve ngawt ang.

Duata      : Hehehe…. doctor nih chak ve ngawt? Doctor ni turin eng subject nge lak ngai pawh i hria mi?

Hruaii     : Hria e!!,

Duata      :Eng?

Hruaii     : Science ! Sir Awia sawi dan chuan tluang taka lehkha kan zir chuan kum kum 23-ah MBBS a zawh theih.

Duata      : Hre leh si ve… taima taka I zir chuan I thei hrim hrim, Sir Mawia pawn Taimakna hi Hlawhtlinna nu a ni tih a sawi zing rap.

Hruaii     : Ka van hrethiam lo.

Duata      : Aw hei… nuin fa a hring  ang hian Taihmakna chuan hlawhtlinna a  hring tihna a ni mai alawm!

Hruaii     : Tikhan…Ka man chiah…Van hrilhfiah thiam tak…

Duata      : Over suh!!!

-------------------------------------------------------------------------------------------

Pu Sangpuia leh Pi Dartei te nupa chu rel lem-ah an lo chuang dun a, hlim hmel pu sang hian an thlai thar leh thingtuahte an rawn phur a

Duata      : Pu Sangpuia te hi an thawkrim khawp mai, ka exer lak lai khan feh turin an kal a, thlai an va la aniang.

Hruaii     : An nui sang thei zel mai a, an hmel hmuh a nuam em em reng mai, an fakawm e…

Duata     : Thawhrimna-ah hahchawlhna a awm an tih fo hi an nunah a chiang khawp mai.

School peng an thleng a

Duata      : Nih Mate, Hlim deuhin aw

Hruaii     : Um, nangpawh tha deuhin inkhel dawn nia… Bye ….

--------------------------------------------------------------------------------------------

BADMINTON TOURNAMENT SCENCE

Badminton final-ah chuan Duata leh Muana chuan final an khel a, an inhnehtawk hle mai a. Best of 3-ah Deciding game khelh a ngai a, 20 – 17 –a a lead laiin Duata chu a inhliam hlauh mai a, Muana chuan 19 thleng a han pawtthla hman a, a inhliam lai hian chaw ei laia a pa fuihna a mitthlaah a lang a, Pathian hnenah a tawngtai a, vanneihthlak takin Duata smash chu Muana chuan a la thei ta lova Duata chu a champion ta a ni.

FEH SCENE

Duata te an inkhelh lai hian Hruaii leh a nu chu feh turin an kal thung a, a thiante picnic tura motor kal nen chuan an intawk a, Hruaii pawhin a mittui a hru fap fap a. 

Lo an thleng a…

Hruaii     : Anu, khawi lai chin khu nge kan lo?

Nu           : Khu laia thingding khu i hmu em? khu mi thlang lam khu Pu Faka te lo ania, chuan a chhak lampang hi kan lo a nih hi.

Thlai te chu an la a….

Hruaii     : Nu, Fanghma te  hi an lian tawh rap…

Nu            : Nia, kan feh khat tawh deuh a, an lo lian hman tawh viau mai… Ruah a tlak chuan Vaimim te pawh hei an thang zawt zawt mai… 

Lo-ah thlai an lak zawh hnu chuan lo atang chuan an haw a …….

Hruaii     : Anu, hnuhram leh hnuhpui hi engnge a danglamna?

Nu           : Ruah a rawn sur hian hlo an lo thang lian a, lo vawi khat thlawh chhuahna hi  hnuhpui ania, fur a nih avangin thlawh nawn a ngai thin a, a vawi hnihna hi  hnuhhram an ti thin

An kal zel a….

 Nu                : Mate ka lu a hai riau mai… (A tlu nghal ta mai a…..)

Hruaii     :  Anu, anu, eng tinnge i awm ? Nu harh rawh….A nu….(A awma nem pahin thlaphang takin a nu chu a au a)

  PHC Pangzawl-ah Hruaii nu chu phurh a ni a, doctor chuan investigation a neiin, treatment tul ang te pek a ni a, doctor lo chhuak chu Hruaii leh apa chuan an lo ngaihven vat a.

 Pa                    : Doctor, Engnge kan an?

 Doctor            : In nu natna hi syncopia a ni a, a lo dehydrate nasa a, a BP a lo hniam bawk nen. Nikhaw hre lovin a awm ta a nih hi. A tirah bawisawmtu awm lovin, lokal  har deuh  ni ula chu hei ai hian a dinhmun a ngaihtuahawm dawn a, mahse, hei tunah chuan a tha tawh lutuk ania, in va hmu thei ang. 

Doctor thusawi a hriat chuan Hruaii chu a lawm hle mai a, a thuawih vanga a nu nunna chhan a ni chu a lawm hle mai. A nu lam chu a pa nen chuan an pan ta nghal a.

Hruaii             : Doctor thusawi atang chuan vawiin-ah khan, anu kiangah awm lo ila chuan, nu chan thei dinhmunah ka ding a lo ni a, a thuawih a, a kianga ka awm kha ka va lawm tak em! Lalpa ka lawm e. 

ZAN RIAH EI KHAM

An chhungkua chuan TV an en a,

Pa                   : Bawiha , chanchin thar a ni dawn tawh ang a…

Chawngvung Vision chanchin thar chu an thlir ta a.

News Presenter : Chawngvung Vision Chanchin thar thlirtu zawng zawngte chibai vek ule,  Tualchhung chanchin thar i lo thlir hmasa ang.   Vawiin chawhnu khan Pangzawl Badminton Club buatsaih Under-15 Badminton  Competition chu khar fel a ni. Final Match hmuhnawm takah Zonunkima  chuan Game 1-na 21 – 17 in a la a, Game-2 na hi PC Lalmuanzuala’n 21 – 18 in a la ve leh  thung a ni. Deciding Game ah Zonunkima’n championship point a  hmuh hnuah a ke ah hliam neiin, PC Lalmuanzuala hian  a pawtthla hman tep a, a tawp-ah erawh  Zonunkima hian a mamawh point 1 vaw chhuakin, champion cup a hum haw ta a ni. 

Duata -    He tournament atan hian theihtawpin ka inbuatsaih ve a, infiamna lam hi ka tuina leh  ka kal tumna  a  nih avangin regular takin zingkarah exer ka la thin. Tin,  ruihtheihthil, zuk leh hmuam hi ka ti ngai lo bawk. Final-ah khan Muana nen khan skill-ah chuan kan in tluk 

khawp mai, Amaherawhchu, ka champion chhan nia ka hriat chu Pathian min   tanpuina, ka tawngtaina rah liau liau a ni.

News Presenter – Vawiin chawhma dar 10-ah khan Govt Pangzawl High School chuan School Auditorium-ah HSLC result chhuaka an school atanga hlawhtlinna changte lawmpuina hun an hmang. Govt Pangzawl High School atang hian candidates 40 awmin mi 36 in hlawhtlinna an chang a, Pass percentage za-ah 90 a ni. Zirlai hlawhtlinna changte zingah hian Vanlalhruaizeli chuan ti tha berin, subject zawng zawngah letter mark a hmu a, Incentive Award hlan a ni.  Felicitation programme hi Pu C Lalzaipuia, Circle Education Officer-in hmanpuiin zirlaite fuihna hun a hmang.

Pu C Lalzaipuia, CEO - Tunlai khawvel-ah chuan competition a sang tawh em em a, zirna kawngah a ni emaw, infiamna kawngah a ni emaw, kan sumdawnna kawng-ah a ni emaw  kan elpui te tih chin piah lamah extra-a kan chet a ngai tawh a ni. American football coach lar tak Vince Lombardi chuan ‘Dictionary chiah hi Taihmakna hmaa Hlawhtlinna awmna hmun a ni’ tiin a sawi a, a dik hle a ni Taihmakna leh Thusawihna hi Hlawhtlinna

                 kawngka hawnna chabi pawimawh tak tak pahnihte an ni.

‘Taihmakna leh Thusawihna hi Hlawhtlinna kawngka hawnna chabi pawimawh tak tak pahnihte an ni’ tih thu chuan Duata chu a tiharh thut mai a, Taihmakna leh Thuawihna belh chhuah chu Hlawhtlinna a ni tih chhut chhuakin, an zirtirtu-in riddle a pek chu a ngaihtuah chhuak thut a, lawm takin notebook-ah riddle chhanna chu a ziak ta a ni.

Taihmakna + Thuawihna = Hlawhtlinna

T + T = H

2T = H