He zawhna hian ka tleirawl nun pumpui hi a eiral a ni ringawt mai, High School ka kal aṭanga college ka kal thlengin ka thinlung hi a chhuahsan thei lo a ni ber mai.

Lo inngaihzawng ta ila, engtinnge ni ang?

Ka tana Pathian ruat lo ni lo ta se la, engtinnge ni ang?

Ka tana Pathian ruat chu tawng lo ta ila?

Ngaihtuah tûr a va tam em!!Heng zawhna te hian min luah reng mahse… Ka tan chuan hriatthiam phak a ni si lo.

Nimahse, ka pasal James hi ka tana Pathian ruat ngei a ni tih ka hriat theihna dan share che u ka duh a ni.

Eric a lo lang (A hming tak a ni lo)

College ka kal ṭan a, ka First love ni tûrin Erica nen kan intawng a, a ni chu ṭhalai hruaitu fel leh ṭha tak mai a ni a, kohhran-ah zaihruaitu ṭha tak a ni bawk. Ka nun a luah hneh ngei mai. Pasal tûr atana duhthusam ka siam list-a nihphung ho zawng zawng amahah a kim.

Marawhchu, kan harsatna kan tâwk fo mai a, min thunun tlat hi a tum ṭhin a, ‘i tlâktlái lo e’ti hialin min hrilh ṭhin. Inhualna siam kan tum lai takin ka pa’n harsatna siamin inhualna neih a phal ta lo a, kan inṭhen ta a ni.

Eric-a nena kan inngaihzawn aṭang hian thil zirchhuah tam tak ka nei a. Mihring pawnlam-a an landan an rawngbâwlna lansarh leh ṭhat avang ngawt hian pasal atan an tlâk ngawt lo tih te, mi hi an ngaihawm em avang te, an duhawm kan tih em avang hian mi rintlâk an ni kher lo tih te a ni.

Erica nen kan inṭhen hnu hian pasal atana duhthusam list dang ka siam leh tâ a-

∙ Pathian hmangaih a,a chhungte ngaihlu ṭhintu.

∙ Mi taima, nunnghet leh nun tluang nei mi, mi rintlâk.

∙ Mi tihlim thiam, nileng-a a bula awm ka nin loh tûr.

∙ Mi a hmathlîr leh ka hmathlîr inkawp rem tûr (Missionary nih ka tum)

∙ Mi hip tûra ṭha, pianphunga hleitlinna lam ni lovin.

Erica nen kan inṭhen hnu hian mipa lam ka ngaihtuah dâwn hian hlauhthawnna in ka khat ṭhin a, hei chu ka tan a ni lo ni hian Pathianin min hrilh ṭhin nite hian ka hre ṭhin a, hun rei tak chhung chu ka mal tâ a ni.

Matt a lo lang ve leh (A hming tak a ni lo)

Matt-a nen hian college hnuah kan intawng a. Matta nen hian kan innei ngei dawn tih ka hre nghal a, ka tan chuan ‘mi ṭhafamkim’ hi a ni tawp mai a ni. A pianphung ka duhthusam a nih bâkah rawngbawlna ngaina mi a lo ni kher bawk a.

Mahse, mihring hi kan inhriatchian tak tak loh hi chuan kan lo inring sual fo ṭhin a nih hi… Matt-a pawh hi ka tan chuan mi ṭha tâwp niin ka lo ngai a, a zûna ka lo uai lutuk vâng leh ka duh lûat vangin amaha ṭhatna awm chauh ka lo hmu lian a ni tih ka hrechhuak leh tâ,

Kan ngaihtuahna ngawt hi chuan min bum hma thei hlê mai tih ka zir chhuak leh tâ...Kan duhna-ah chuan Pathian remruat ni-ah pawh kan lo ngai sam viau ṭhin a lo ni.

Travis a lo lang (A hming tak a ni lo)

Kum 25 ka nih chuan mi danglam tak mai, sam buang thak mai, Italian mi, hmeltha leh star awm tak mai chu ka nunah a lo lût leh ta a. Rawngbawlna lam-ah chuan stage-a intarlang zawngin a inhmang ve lo a, lang lo lamah erawh a pute nen tangkai takin an inhmang thung a ni. Travis hi ka tan chuan himna a ni ringawt mai, ka hlauh -thawnna te min sut bo thiam sak ṭhin takzet a ni.

Mahse, Travis nen hian kan thil duh a thuhmun lo fo mai ṭhin a, hmangaih tak tak lo ni hian a chang phei chuan ka inhria a, Pathian hian midang ka tana dah a neih hi ka ring leh tlat thin. Tichuan, Travis nen hian kan inṭhen ta nge nge a, a tir-ah chuan ka nuna duhthlanna ka siam sual ber ni hialin ka ngai a, ka la na takzet a ni. Marawhchu hun engemaw ral hnu chuan Travis chuan a tana mi ṭha tak tûr a tawng ta a, ka nun-ah pawh mi thar a lo lang ve leh ta.

James (A hming tak a ni )

James-a nen hian naupan lai daih atang tawh khan inhriat thu-ah chuan kan inhre tawh a, Mahse kan inngaihzawn ṭanna chu reilote niin tunah chuan kan innei tawh a ni.

A tirah chuan James-a nen hian kan che romantic thiam lem lo hle. Thil thar lawm leh thuamhnaw-ah pawh a chhuak thar apiang lawm ṭhin-ah min ngai a, kei pawhin James chu fiamthu lam ngaithei miah lo, mûk rûn mai niin ka ngai a, kan tisual vê vê a ni.

Kan in date hmasak ber zawh chuan ka ṭhen hman teuh hle a, a ni pawh a rilru a lo buai viau a ni awm e, mahse hengte hi kan hmuchhuak chho ṭan ta a -

∙ Kan inpawhin hlim takin kan inkawm ṭhin a, inhnialna leh inremlohna-ah pawh inpawh takin kan inbe thei ṭhin.

∙ Hun hman dun nuam kan ti êm êm ṭhin, ka ni-in mi an bula awm i thlâkhlelh loh chu nei suh min tih hi ka hrechhuak fo ṭhin.

∙ Pathian-in ka tana a mi ruat nia ngaihna thûk tak ka nei tlat a ni.

∙ Ka chhungte ve ve pawh an inrem hle a, nidanga ka pa’n ‘Midang ṭha zâwk i hmu ang’ tia min hrilh ṭhin kha tûnah chuan inneih lam hawi ṭawngkam a nei vê ṭan tâ a ni.

∙ Kan hmalam huna kan awmdan tûrah pawh kan inrem hle.

Hetiang khawp hian innelin inngaizawng thûk mah ila, innei tûra thuthlûkna han siam meuh chu a harsa ṭhin hle mai.

Pasal neih hi kham kotlang aṭanga zuan thlâk nen hian Inanna an nei a, A kotlang aṭanga chuan zuang thla tâ ila, eng ang chiah nge thil thleng dawn tih chu kan thlithlai-in kan zir thei a, mahse, a tak ram erawh chu zuan thlak hnu chauh-a hriat theih a ni lawi si.

Ka ṭawngṭai a,ṭhenrualte leh ka chhungte ngaihdan te lain James-a chu hriatchian tak tak tumin ka bei bawk a,

A tawpah chuan, ka zuang thla ta rawih mai a, Ka inchhir lo hle mai.

Tunah chuan James-a chu ka tana Pathian ruat a ni tih ka hrechiang ta e, ‘Thihna-in min ṭhen hma loh zawng ….’ tiin thu kan tiam tâ a ni.

Pathian hmaa inneih thu i thlun hma chu i tana Pathian chu zawng zel la, ‘Ka tiam a che’ i tih hnuah erawh chu chu i tan a ni tih pawm tlat ang che.

Article - How do I know if someone is the one’ By Tiffay Dawn

Translated - Kimtea Fanai

Source - www.fervr.net