16/07/2019

 “Ka hrethiam thei thlawt lo a ni” Jenny chuan a lo ti bawrh bawrh a. A pasal Laurena chuan a chunga thilthleng chu tu chungah pawh thleng thei a ni a, inngai vanduai lutuk lo turin a thiam ang tawkin a lo fuih bawk a.

Jenny chuan a bengah harsatna neiin, a doctor rawn chuan hun rei lo te-ah a beng hriatna a hloh mai tur thu a lo hrilh a ni.

Doctor thusawi chu a khat tawkin a hre chhuak leh thin a. A tuar tur atana a rin ngai loh leh a beisei loh thilin a tlakbuak mai chu hriatthiam harsa a ti takzet a ni. Tum khat chu kawnga a kal lai hian doctor thusawi chuan a rilru a luah leh vung vung mai a; thawk leh khata motor break ri hrawk a hriat meuh chuan chu motor chuan a lo su tep hi a lo ni a, a phuzawk mai a, motor ri pawh a hre tha tawh lo a ni tih a hre chhuak a, doctor thil sawi lo thleng dik zel chuan a ti mangang hle mai a, a chanah lungawi har a ti takzet a ni.

Tlai khat chu, library-ah lehkhabu hawh turin a va kal a, hun engemaw chen a hman hnu chuan a awmna room light chu a lo thim a, a han hawi kual meuh chuan midang hmuh tur reng an lo awm tawh lo. Library chhungah kalh hnan a ni ta mai a. Library closing Anouncement pawh a hre  tha thei tawh lo a ni tih a hrechhuak leh ta a, beidawng taka library kawngkhar a chum dawt dawt lai chuan Laurena chu, a rin aia a thang rei avangin Jenny ngaihven tur-in a lo lang ve chiah a, librarian te biain, an in hawn pui leh ta a ni.

Hemi zan-ah hian Jenny chu a ngaihtuahna a buai zual hle mai a, Laurena chuan a thiam ang tawkin Pathianin nat a phal thute chu a’n hrilh ve tak nain, Jenny chuan midang chunga thleng miah lo a chunga a thleng chu hriatthiam har tiin a tap tlawk tlawk reng mai a; Laurena chuan ‘Nangmah ngeiin Pathian aw i hriat a ngai a nih hi” tiin a kalsan ta a ni.

A tuk a lo inherchhuak a. Jenny chu an khaw kiang lui kam hmun mawi tak maiah chuan a kal a.

“Aw Lalpa, I thilsiam sava hram mawi tak te, he tui luang ri her her ka hriat thinte kha ka hre thei tawh si lo; ka va hrethiam lo tak em!! Khawngaihtakin ka chunga thil thleng hi i hremna nge min fiahna zawk tih min hriattir lul rawh!! I aw hriat ka duh Lalpa, min pui rawh” tiin a tawngtai a.

Chu hmun atanga a haw kawngah chuan,

‘Kan chaklohna kaltlangin Pathianin hna thawk thin’ (Johana 9:2-3) tih thu inziak hi a hmu fuh hlauh mai a, a thinlung chu engthawlna mak tak mai hian a luah chho tan a, a bula Biak In-ah chuan lut nghalin Johana 9:2-3 thu chu a chhiar ta a,

‘Tin a zirtirten a hnenah, “Rabbi, mitdel saa a pian hi tuin nge thil tisual, hemi hian nge a nu leh a pain? an ti a, an zawt a.

Isuan, ‘Hemi hian a tisual hek lo, a nu leh a pain an tisual hek lo; Pathian hnathawh a chunga a lanna tur a nih zawk hi’ tih thu chu a chhiar ta a.

Jenny chuan, Pathian aw ngei a hre ta chu thinlung lawmna leh hlimnain a khat a, 

“Aw Lalpa, ka lo hriatthiam loh avangin min ngaidam ang che’ Lalpa, ka nunah hian thu lo sawi zel rawh aw, ka harsatna kaltlanga i hnathawh duh chu i thawh theih nan i hmanrua ni turin ka inhlan e”

tiin thinlung lawm takin Pathian hnenah a chaklohna zawng zawng nen a inhlan thar leh ta a ni.

Kan chaklohna hi Lalpa min hnaih zual tirtu a ni thin a, Pathian hnaiha awm theih baka malsawmna hlu chuang a awm lo ve.

II Korinth 12 : 9

“Ka khawngaihna i tan a tawk e, Ka thiltihtheihna hi chak lohnaah asin tihfamkimin a awm ni”